~~META:
title = Уладзімір Дубоўка — Пальцы жоўтых кляновых лістоў
&keywords = Пальцы, жоўтых, кляновых, лістоў
&abstract = Чытаць верш "Пальцы жоўтых кляновых лістоў" Уладзіміра Дубоўкі
&iftrue = nan
~~

====== Уладзімір Дубоўка — Пальцы жоўтых кляновых лістоў ======
Пальцы жоўтых кляновых лістоў\\
мкнуцца восень схапіць за шыю.\\
Не парушаць яе хараство,\\
не парушаць лісты залатыя.\\
\\
Клён у вокны забразгатаў,\\
адгукнулася каняю рэха.\\
Месяц рваў арэхі з куста,\\
раскідаў над сусветам арэхі.\\
\\
Яны ў воўне блакітнай ляглі,\\
сумавала ў даліне ляшчына.\\
Летуценні не змерклі ў галлі,\\
летуценняў згасіць немагчыма.\\
\\
Расцярушацца ў далі і ўвысь,\\
каб нагадваць аб светлым над чорным.\\
Ці таму, што сумуюць журавы,\\
ненасытна свіргочуць жорны?..\\
\\
Ліставея не моўкне, шуміць\\
ад вясны да вясны на прасторах.\\
Поверх стрэх і муроў камяніц\\
я пабачыў яе учора…\\
\\
Дзесь далёка галосіць сава,\\
небакрай апрануўся жалем.\\
Людзі любяць душу прасаваць,\\
калі гэта душа чужая.\\
\\
1925

 


===== Падобныя старонкі =====
  * [[творы/уладзімір-дубоўка/уладзімір-дубоўка-як-сінячок-да-сонца-лё]]
  * [[постаці/уладзімір-дубоўка]]
  * [[творы/уладзімір-дубоўка/лірыка-уладзіміра-дубоўкі]]
  * [[творы/уладзімір-дубоўка/уладзімір-дубоўка-часіна-ды-з-сокам-рабі]]
  * [[творы/уладзімір-дубоўка/уладзімір-дубоўка-паляжам-мы]]