~~META:
title = Уладзімір Дубоўка — Не кажу – запявайце, цымбалы
&keywords = кажу, песня, крыніца, страі, цымбалы, струны, запявайце, нічога, ведаю, струна
&abstract = Чытаць верш Уладзіміра Дубоўкі "Не кажу – запявайце, цымбалы"
&iftrue = nan
~~

====== Уладзімір Дубоўка — Не кажу – запявайце, цымбалы ======
Не кажу – запявайце, цымбалы,\\
не кажу – струна да струны.\\
На нервах сваіх мы іграем\\
і складаем лады, страі.\\
\\
Разліваецца смага па жылах,\\
як пялёсткі ў павевах вятроў.\\
Мне калісьці цыганка варажыла,\\
што загубіць мяне мая кроў.\\
\\
Хай мяне, а нікога іншага,\\
хай мяне, а нікога больш.\\
Вось не ведаю нічога сіньшага,\\
чым вочы дзявочыя і боль.\\
\\
I нічога не ведаю больш белага,\\
чым ростань нечаканая і снег.\\
А сняжынкі ўсё лётаюць-бегаюць,\\
і здаецца, гэта ўва сне.\\
\\
Ой, браточкі мае, таварышы,\\
ды чаму ж гэта ў радасці сум?..\\
Нечакана возьмеш завалішся,\\
столькі песень я ў сэрцы нясу.\\
\\
Вось каб так праспяваць іх, як думаю,\\
вось каб так, як кладуцца яны...\\
Аплывае крыніца шумаю,\\
ці адкінуць яе далані?\\
\\
Але ж песня, ты, песня... ой, песня!\\
Ты пакрышыш наносную твань!\\
Калі кажа паэт, што Прадвесне, –\\
дык пачне зелянець трава.\\
\\
Не кажу – запявайце, цымбалы,\\
не кажу – струна да струны.\\
Калі нерваў нам будзе мала, –\\
з пачуццёў заснуем мы страі.\\
\\
1925\\


\\
Крыніца: Душа мая тужлівая... : вершы і паэмы / уклад. В. А. Шніп. – Мінск: Маст. літ., 2005. – 303 с. – (Беларуская паэзія ХХ стагоддзя).

 


===== Падобныя старонкі =====
  * [[постаці/уладзімір-дубоўка]]
  * [[творы/уладзімір-дубоўка/уладзімір-дубоўка-паляжам-мы]]
  * [[творы/уладзімір-дубоўка/лірыка-уладзіміра-дубоўкі]]
  * [[творы/уладзімір-дубоўка/уладзімір-дубоўка-часіна-ды-з-сокам-рабі]]
  * [[творы/уладзімір-дубоўка/уладзімір-дубоўка-як-сінячок-да-сонца-лё]]