~~META:
title = Уладзімір Дубоўка — Зацвітай, зара, на небасхіле
&keywords = Дубоўка, зара, небасхіл
&abstract = Чытаць верш Уладзіміра Дубоўкі "Зацвітай, зара, на небасхіле"
&iftrue = nan
~~

====== Уладзімір Дубоўка — Зацвітай, зара, на небасхіле ======
Зацвітай, зара, на небасхіле,\\
зараніца, закрасуй ты ружай!\\
Што на свеце роўнага па сіле\\
знойдзецца да шчырай дружбы?\\
\\
Злосць людскую скнара хай збірае,\\
абыходзім подласць мы здалёку.\\
А вось радасць, што цвіце над краем,\\
у юнацкіх сэрцах не замоўкне.\\
\\
Яна з воч свіціцца светла-сініх,\\
яна з воч свіціцца васільковых,\\
і ў вачах не згасне, не застыне,\\
адгукнецца ў задушэўных словах.\\
\\
Зацвітай, зара, ў ліловых сценях —\\
пунсавеюць і яны паволі.\\
Калі сёння думкі ў летуценнях, —\\
не загаснуць у жыцці ніколі.\\
\\
Закрасуй ты кветкай, зараніца,\\
над прасторам родным з небасхіла,\\
каб краса, ў пялёстках што ільсніцца,\\
нас праменнем ясным азарыла.\\
\\
Маладосці сіла залатая\\
з зараніцаю красуе ружай.\\
Сэрцам шчырым мы яе вітаем,\\
мы яе з табой і любім, дружа.\\
\\
1926

 


===== Падобныя старонкі =====
  * [[творы/уладзімір-дубоўка/лірыка-уладзіміра-дубоўкі]]
  * [[творы/уладзімір-дубоўка/уладзімір-дубоўка-часіна-ды-з-сокам-рабі]]
  * [[постаці/уладзімір-дубоўка]]
  * [[творы/уладзімір-дубоўка/уладзімір-дубоўка-паляжам-мы]]
  * [[творы/уладзімір-дубоўка/уладзімір-дубоўка-як-сінячок-да-сонца-лё]]