~~META:
title = Уладзімір Дубоўка — Вядзі мяне, як і вяло ты, сэрца...
&keywords = зямлі, перамогі, вялікі, цяжар, жыццё, вядзі, ляжаць, жыцця, адгукнецца, шлях, ясны, сэрца, задушэўнай, любімае, краса
&abstract = Чытаць верш Уладзіміра Дубоўкі "Вядзі мяне, як і вяло ты, сэрца..."
&iftrue = nan
~~

====== Уладзімір Дубоўка — Вядзі мяне, як і вяло ты, сэрца... ======
Вядзі мяне, як і вяло ты, сэрца,\\
на ясны шлях з табой мы узышлі.\\
Няхай краса любімае зямлі\\
у задушэўнай песні адгукнецца.\\
\\
Я з кожным днём раблюся больш цвярозым,\\
хоць з большай смагай чару п’ю жыцця.\\
Мінаюць дні і крыллем шалясцяць,\\
кладуць адбіткі на дасціпны розум.\\
\\
Пульсуе кроў мая спрадвечнаю крыніцай...\\
То не мая, то пакаленняў кроў!\\
Яны жылі і будуць жыць ізноў,\\
крылаты час над імі будзе віцца...\\
\\
Схіляюся і слухаю пакорна,\\
маўклівасць слухаю і гэты шум.\\
Цяжар вялікі я ў сабе нашу,\\
а ён жа меншы быў, цяжар, учора...\\
\\
У ім ляжаць здабыткі нашых продкаў,\\
ляжаць лятункі-мроі ўсе мае,\\
ляжыць усё, што нам жыццё дае\\
за век вялікі і такі кароткі...\\
\\
Урэшце прыйдзе вокамгненне хіжа,\\
затуліць вочы, вушы мае, рот,\\
а вечнасці няўмольнае пяро\\
апошні верш мой на зямлі напіша...\\
\\
I прыйдуць новыя на свет наш пакаленні,\\
якія будуць жыць у харастве Камун.\\
Жыццё аддам я хараству таму,\\
найдаражэйшаму дам летуценню.\\
\\
Бо там, за горамі гадоў, падзеі,\\
якія ўзмоцніць праца нашых рук.\\
За іх – усе цяжары падыму,\\
за іх і супраць розных ліхадзеяў.\\
\\
Наколькі хопіць сілы ў мяне, змогі,\\
наколькі хопіць дзён жыцця майго, –\\
мы пойдзем хваляй, палкай, як агонь,\\
ад перамогі і да перамогі.\\
\\
А ты вядзі мяне, маё ты сэрца,\\
на ясны шлях з табой мы узышлі.\\
Няхай краса любімае зямлі\\
у задушэўнай песні адгукнецца.\\
\\
1927\\


\\
Крыніца: Дубоўка У. Выбраныя творы: у 2 т. Т. 1. Вершы. – Мінск: Беларусь, 1965. – 540 с.

 


===== Падобныя старонкі =====
  * [[постаці/уладзімір-дубоўка]]
  * [[творы/уладзімір-дубоўка/уладзімір-дубоўка-паляжам-мы]]
  * [[творы/уладзімір-дубоўка/лірыка-уладзіміра-дубоўкі]]
  * [[творы/уладзімір-дубоўка/уладзімір-дубоўка-як-сінячок-да-сонца-лё]]
  * [[творы/уладзімір-дубоўка/уладзімір-дубоўка-часіна-ды-з-сокам-рабі]]