~~META:
title = Тарас Шаўчэнка — Думка
&keywords = утапіўся, любі, чужым
&abstract = Верш Тараса Шаўчэнкі "Думка" (у перакладзе Янкі Купалы)
&iftrue = nan
~~

====== Тарас Шаўчэнка — Думка ======
Цяжка-цяжка жыць на свеце\\
Сіраце без роду:\\
Няма куды прыхіліцца, –\\
Хоць з гары ды ў воду!\\
Утапіўся б маладзенькі\\
У той быстрай рэчцы;\\
Утапіўся б – цяжка жыці,\\
І няма дзе дзецца.\\
Ходзіць доля ў каго полем,\\
Каласкі збірае,\\
А мая дзесь, нягодніца,\\
За морам блукае.\\
Добра таму багатаму:\\
Яго людзі знаюць;\\
А са мною сустрэнуцца –\\
Вокам абмінаюць.\\
Багатага, губатага\\
Дзяўчына шануе;\\
З мяне, сіраты гаротнай,\\
Смяецца, жартуе.\\
"Ці я ж табе не прыгожы,\\
Ці не ў цябе ўдаўся,\\
Ці не люблю цябе шчыра,\\
Ці з цябе смяяўся?\\
Любі ж сабе, маё сэрца,\\
Любі, каго знаеш,\\
Але з мяне ты не смейся,\\
Калі ўспамінаеш.\\
А я пайду на край свету...\\
На чужой старонцы\\
Знайду лепшую ці згіну,\\
Як той ліст на сонцы".\\
Пайшоў казак сумуючы –\\
Нікога не кінуў;\\
Шукаў долі ў чужым полі\\
Ды там і загінуў.\\
Уміраючы, ўглядаўся,\\
Дзе сонейка ззяе...\\
Цяжка-цяжка уміраці,\\
Цяжка ў чужым краі!\\
\\
Гатчына, 1838\\
\\
Пераклад: Янка Купала

 


===== Падобныя старонкі =====
  * [[творы/тарас-шаўчэнка/жыццё-і-творцасць-тараса-шаўчэнкі]]
  * [[ibdc.ped>славуты-сын-украіны]]
  * [[творы/тарас-шаўчэнка/тарас-шаўчэнка-сон]]
  * [[творы/тарас-шаўчэнка/тарас-шаўчэнка-і-на-чужыне-я-узрос]]
  * [[творы/тарас-шаўчэнка/тарас-шаўчэнка-садок-вішнёвы-каля-хаты]]