~~META:
title = Сяргей Грахоўскі — Твой голас
&keywords = ляцяць, жураўлі, голас, сонца, дрыжыць, зіма, здалося
&abstract = Чытаць верш Сяргея Грахоўскага "Твой голас"
&iftrue = nan
~~

====== Сяргей Грахоўскі — Твой голас ======
Тут сонца і ружы у скверы,\\
Тут спеюць інжыр і хурма,\\
І цяжка адразу паверыць,\\
Што недзе ў Сібіры – зіма,\\
\\
Што хмары, звісаючы нізка,\\
Дарогі вадой залілі,\\
Што восень у нас і над Мінскам\\
Ляцяць і ляцяць жураўлі,\\
\\
Што голыя мокнуць асіны,\\
Што з клёнаў апалі лісты,\\
Ад іх, як ад лапак гусіных,\\
Наўкол чырванеюць сляды.\\
\\
Мне так закарцела дадому,\\
Пакуль не мінуў лістапад,\\
І раптам знаёмы-знаёмы\\
Твой голас паклікаў назад.\\
\\
Даводзіла ты мне старанна,\\
Што трэба на поўдні пажыць...\\
Я чуў, што дрыжыць не мембрана,\\
А радасны голас дрыжыць.\\
\\
Здалося, нібы ўвачавідку\\
Мы побач з табою стаім\\
І провада тонкую нітку\\
Сагрэлі дыханнем сваім.\\
\\
Здалося, крануліся скроняў\\
Гарачыя вусны твае,\\
Даспеў вінаград на адхоне,\\
І сонца над намі ўстае.\\
\\
Бо шчасце не ведае меры,\\
А шчасця без веры няма.\\
Няхай жа і ў нашыя дзверы\\
Не грукае болей зіма.\\
\\
І раптам, не скончыўшы сказа,\\
Ты змоўкла: хвіліны прайшлі...\\
І зноў над хрыбтамі Каўказа\\
Аднекуль ляцяць жураўлі.\\
\\
1959\\


\\
Крыніца: Грахоўскі, С. Выбраныя творы. У 2 т. Т. 1. Вершы [Аўт. прадм. В. Вітка]. – Мінск: Мастацкая літаратура, 1983. – 382с.

 


===== Падобныя старонкі =====
  * [[творы/сяргей-грахоўскі/сяргей-грахоўскі-прызнанне]]
  * [[творы/сяргей-грахоўскі/сяргей-грахоўскі-мама]]
  * [[творы/сяргей-грахоўскі/сяргей-грахоўскі-стары-млын]]
  * [[творы/сяргей-грахоўскі/сяргей-грахоўскі-чалавеку-патрэбна-не-сл]]
  * [[постаці/сяргей-грахоўскі]]