~~META:
title = Сяргей Грахоўскі — Сунічкі
&keywords = сунічкі
&abstract = Чытаць верш Сяргея Грахоўскага "Сунічкі"
&iftrue = nan
~~

====== Сяргей Грахоўскі — Сунічкі ======
Каля поўнае крынічкі\\
Пахаваліся сунічкі\\
Пад сцяблінкі і лісты\\
I за ельнічак густы.\\
\\
З раніцы да ночкі\\
Бомкаюць званочкі,\\
Галасочкам тонкім\\
Клічуць іх рамонкі.\\
\\
Сойкі і сінічкі\\
Свішчуць: «Дзе сунічкі?»\\
I ўсю ноч крычыць сава:\\
«Я шукаю іх сама!»\\
\\
Абазваліся сунічкі:\\
«Мы хаваемся, як знічкі,\\
Прыпадаем да зямлі,\\
Каб адразу не знайшлі,\\
Каб з травой і зеллем\\
Зайчыкі не з'елі.\\
Любім мы свае лясы,\\
Любім вашы галасы,\\
Хто не вельмі ганарыцца,\\
Нам павінен пакланіцца.\\
Калі схіліцца хоць раз,\\
Пад лістамі знойдзе нас».\\
\\
I чырвоныя суніцы\\
Зніклі зноў, як чараўніцы.

 


===== Падобныя старонкі =====
  * [[творы/уладзімір-ягоўдзік/уладзімір-ягоўдзік-суніцы]]
  * [[творы/казімір-камейша/казімір-камейша-суніцы]]
  * [[ibdc.ped>суніцы]]
  * [[творы/аляксей-якімовіч/аляксей-якімовіч-падзяка]]
  * [[ibdc.ped>суніцы-паспелі]]