~~META:
title = Сяргей Грахоўскі — Стары млын
&keywords = Грахоўскі, стары, млын
&abstract = Чытаць верш "Стары млын" Сяргея Грахоўскага
&iftrue = nan
~~

====== Сяргей Грахоўскі — Стары млын ======
Не пытаюся, куды вядзе дарога.\\
Калі ёсць, дык некуды вядзе...\\
Можа, да млына таго старога,\\
Што ужо не меле, а гудзе\\
\\
Вецер у пустых кашах і скрынях,\\
Зарастаюць мохам латакі,\\
I ляжыць на бэльках, быццам іней,\\
Пыл калісьці змеленай мукі.\\
\\
Не, не збіўся. Прывяла дарога:\\
Млын дрыжыць адбіткам на вадзе.\\
Пагукаў, але няма нікога,\\
Нават следу не відно нідзе.\\
\\
На прантах парэпаліся жорны,\\
Пацукоў цікуе кот рабы,\\
На прыступках і ў паддашшы чорным\\
Стогнуць і жыруюць галубы.\\
\\
А было ж завознікаў памногу,\\
Жорны аж да поўначы гулі,\\
I вазы ў далёкую дарогу\\
Везлі мліва цёплыя кулі.\\
\\
Паглядзеў на млын, нібы на страту\\
Даўніны забытай і нямой,\\
I сумеўся, разабраўшы дату,\\
Што забыты млын — равеснік мой.\\
\\
1987

 


===== Падобныя старонкі =====
  * [[творы/сяргей-грахоўскі/сяргей-грахоўскі-прызнанне]]
  * [[творы/сяргей-грахоўскі/сяргей-грахоўскі-мама]]
  * [[творы/сяргей-грахоўскі/сяргей-грахоўскі-чалавеку-патрэбна-не-сл]]
  * [[постаці/сяргей-грахоўскі]]
  * [[творы/сяргей-грахоўскі/сяргей-грахоўскі-казкі-жыцця]]