~~META:
title = Сяргей Грахоўскі — Прызнанне
&keywords = Грахоўскі, прызнанне
&abstract = Чытаць верш "Прызнанне" Сяргея Грахоўскага
&iftrue = nan
~~

====== Сяргей Грахоўскі — Прызнанне ======
Як я жыў без цябе?\\
І не ведаў, што недзе на свеце,\\
За глухімі лясамі,\\
За сотнямі ўзгоркаў і меж,\\
Не на дальнім сузор’і,\\
А ў нас, на планеце\\
Ты ў зялёным і ціхім завулку жывеш.\\
\\
Як я жыў без цябе?\\
А маглі ж не сустрэцца ніколі,\\
За паўкрока\\
Адно аднаго абмінуць,\\
Разысціся, як сцежкі расходзяцца ў полі,\\
І не знаў бы за страту каго папракнуць.\\
\\
Мабыць, трэба было\\
Праваліцца у пекла,\\
Траціць блізкіх, пакутаваць,\\
Мерзнуць, гарэць,\\
Ратавацца,\\
Каб лютая сцюжа не ссекла,\\
Каб цябе пад Палярнаю зоркай сустрэць.\\
І пазнаць,\\
І адразу забыцца аб крыўдзе,\\
Каб убачыць праменьчыкі\\
Ў зрэнках тваіх,\\
Нарадзіцца ізноў\\
І паверыць, што прыйдзе\\
І збавенне, і шчасце\\
Адно на дваіх;\\
Падабрэць, памякчэць,\\
Назаўседы скарыцца\\
Непадкупнай\\
Суровай тваёй чысціні,\\
Каб істоты тваёй адкрываць таямніцы,\\
Каб душу гартаваць на высокім агні.\\
\\
Час ляціць і ляціць,\\
Завіруха завеяла скроні,\\
Пакідаюць насечкі\\
Гады на ілбе.\\
Я гляджу на цябе,\\
Я дзіўлюся і сёння,\\
Чым я жыў без цябе,\\
Як я жыў без цябе?..

 


===== Падобныя старонкі =====
  * [[творы/сяргей-грахоўскі/сяргей-грахоўскі-чалавеку-патрэбна-не-сл]]
  * [[творы/сяргей-грахоўскі/сяргей-грахоўскі-мама]]
  * [[творы/сяргей-грахоўскі/сяргей-грахоўскі-казкі-жыцця]]
  * [[творы/сяргей-грахоўскі/сяргей-грахоўскі-стары-млын]]
  * [[постаці/сяргей-грахоўскі]]