~~META:
title = Сяргей Грахоўскі — Мінае лета
&keywords = толькі, белае, лета
&abstract = Чытаць верш Сяргея Грахоўскага "Мінае лета"
&iftrue = nan
~~

====== Сяргей Грахоўскі — Мінае лета ======
Апошні дзень вясны закрэслю\\
У перакідным календары,\\
А ты мне за любоў і песню\\
Усмешку толькі падары.\\
\\
Нас грэлі цёплыя пракосы,\\
Над намі воблакі плылі,\\
Як з келіха, ад смагі росы\\
З лілеі белае пілі.\\
\\
На досвітку шаптала вецце\\
Нам зачарованыя сны,\\
Нібыта у дзівосным свеце\\
Былі з табою мы адны.\\
\\
А тое лета так далёка,\\
Што нават не хапае слоў,\\
I толькі не сціхае клёкат\\
Шчаслівых, як і мы, буслоў.\\
\\
Успамінаю і не веру:\\
Было яно ці не было –\\
Лілеяў водар і аеру,\\
I бусла белае крыло.\\
\\
Навошта патрывожыў сёння\\
Расінку, што сплыла з павек?\\
Мінае лета. I на сконе\\
Шчаслівы наш і горкі век.\\
\\
1995

 


===== Падобныя старонкі =====
  * [[ibdc.ped>летам-у-бары]]
  * [[творы/якуб-колас/якуб-колас-лета]]
  * [[творы/сяргей-грахоўскі/сяргей-грахоўскі-лета]]
  * [[ibdc.ped>шчаслівая-ўсмешка-лета]]
  * [[творы/максім-багдановіч/максім-багдановіч-плакала-лета-зямлю-пак]]