~~META:
title = Сяргей Грахоўскі — Казкі жыцця
&keywords = Грахоўскі, казкі, жыццё
&abstract = Чытаць верш "Казкі жыцця" Сяргея Грахоўскага
&iftrue = nan
~~

====== Сяргей Грахоўскі — Казкі жыцця ======
А я дагэтуль веру ў казкі,\\
Хоць казкі розныя былі,\\
То з ласкаю, а то без ласкі,\\
З дабром і з горам на зямлі.\\
\\
Я казкам веру, як і верыў,—\\
Без казак холадна душы.\\
А часам нейкія хімеры\\
Мне шэпчуць: «Лепш не варушы\\
Сваіх балючых успамінаў,\\
Жыві для радасных надзей,\\
Што толькі суцяшаць павінны\\
I сэрца хваляваць радзей».\\
\\
Я часам сам сабе не веру,—\\
Дзе ява, дзе трызня, дзе сон,\\
А казкі пра ліхога звера\\
Трывожаць і да гэтых дзён.\\
\\
То ў казках ажыве яскрава\\
Усё, што цешыла раней,\\
Але бывае часам ява\\
За казку страшную страшней.\\
\\
Жыццё спяшаецца імкліва,\\
Гарыць, то тлее каганцом.\\
Я веру ў казкі са шчаслівым\\
I непрыдуманым канцом.\\
\\
1986

 


===== Падобныя старонкі =====
  * [[творы/васіль-вітка/васіль-вітка-ппш]]
  * [[творы/васіль-вітка/васіль-вітка-казкі-і-краскі]]
  * [[творы/максім-танк/максім-танк-казка-пра-музыку]]
  * [[творы/васіль-вітка/васіль-вітка-вавёрчына-гора]]
  * [[слоўнік/казка]]