~~META:
title = Сяргей Грахоўскі — Вячэрняя малітва
&keywords = малітва, Беларусь
&abstract = Чытаць верш "Вячэрняя малітва" Сяргей Грахоўскі
&iftrue = nan
~~

====== Сяргей Грахоўскі — Вячэрняя малітва ======
Да поўначы, укленчыўшы, хрышчуся,\\
У неба, у зорак і ў Бога малю\\
Даць волю і долю маёй Беларусі,\\
Вярнуць нашу мову, душу і зямлю.\\
\\
Даўно мы знямелі, аглухлі, аслеплі,\\
Зайшоўся ад болю і голас, і зык,\\
Нас прыхадні гналі пад кулі і ў петлі\\
I вырвалі ў нашага Бога язык.\\
\\
А Бог уваскрос, і жывы, і нязводны,\\
Распяты не раз без адходнай імшы,\\
У памяці нашай, у долі народнай,\\
У кожнай жывой акрыялай душы.\\
\\
Зацятыя прыхадні енку не чуюць,\\
Бо ведаюць толькі: «крышы» і «карай»!\\
Пагардай і лютай знявагай лінчуюць\\
I мараць пра «Северо-Западный край».\\
\\
Яго нашы продкі і мы паспыталі,\\
Але не здаліся пякельнай бядзе:\\
Прарока нам Бог дараваў на [[ibdc.ped>купалле|Купалле]],\\
Каб ён запытаўся: «[[творы/янка-купала/янка-купала-а-хто-там-ідзе|А хто там ідзе?!]]»\\
\\
О, Божа магутны, малю і малюся:\\
Спрадвечныя нашы пакуты згадай,\\
Хоць ты заступіся за лёс Беларусі\\
I згінуць не дай.\\
\\
30 чэрвеня — 3 ліпеня 1992 г.

 


===== Падобныя старонкі =====
  * [[творы/ларыса-геніюш/ларыса-геніюш-малітва]]
  * [[творы/янка-золак/янка-золак-божа-ўсяўладны]]
  * [[творы/янка-купала/янка-купала-мая-малітва]]
  * [[слоўнік/малітва]]
  * [[творы/генадзь-бураўкін/генадзь-бураўкін-малітва]]