~~META:
title = Сяргей Грахоўскі — Вечная памяць
&keywords = вочы, сказаць, ноччу, Курапаты
&abstract = Чытаць верш Сяргея Грахоўскага "Вечная памяць"
&iftrue = nan
~~

====== Сяргей Грахоўскі — Вечная памяць ======
//Сябрам-паэтам//

\\
Мы як умелі, так хлусілі\\
Пра новы ўзлёт увышыню\\
I па рэдакцыях насілі\\
Сваю дзяжурную хлусню.\\
\\
Нягоднікам складалі гімны,\\
Зладзеяў славілі ў свой час,\\
А шлях ужо крывава-дымны\\
Быў наканованы для нас.\\
\\
Сурова дом глядзеў пахмуры,\\
I енкі чуліся часцей,\\
A ўверсе маці на скульптуры\\
Пяшчотна гладзіла дзяцей.\\
\\
I нас сяржанты абдымалі,\\
Заткнуўшы кляпамі раты,\\
Наводліў білі і ламалі\\
Суставы, рэбры і хрыбты.\\
\\
I кідалі ізноў за краты,\\
Саджалі голых на калкі,\\
А ноччу везлі ў Курапаты\\
Трэніраваныя стралкі.\\
\\
Тупыя каты толькі ноччу\\
Жыццё укарачалі нам...\\
А як цяпер глядзяць у вочы\\
Яны і дочкам, і сынам?\\
\\
З нас мала хто прыйшоў дадому\\
З бясконцай лютае зімы,\\
I не адзін паэт вядомы\\
Замоўк на трасах Калымы.\\
\\
Ад крыўды я дасюль нямею,\\
Што не гудуць па іх званы\\
I што сказаць пра ўсё не ўмею\\
Так, як сказаць маглі яны.\\
\\
Данос дарэмна нехта строчыць,\\
Каб зноў заткнулі кляпам рот.\\
Не-е! Праўда нам адкрыла вочы\\
I выпрастала ў поўны рост.\\
\\
Звароту больш ужо не будзе\\
У той, даўно пракляты год,\\
Калі людзьмі пастануць людзі,\\
Народам стане наш народ,\\
\\
Калі замучаных мільёнаў,\\
Што толькі вызваліла смерць,\\
На чорным мармуры імёны\\
I ў сэрцах будуць палымнець.

 


===== Падобныя старонкі =====
  * [[ibdc.ped>пімен-панчанка]]
  * [[слоўнік/паэт]]
  * [[творы/янка-купала/тэма-паэта-і-паэзіі-ў-творчасці-янкі-куп]]
  * [[ibdc.ped>мясціны-коласа]]
  * [[творы/янка-купала/эстэтычныя-погляды-янкі-купалы]]