~~META:
title = Сяргей Грахоўскі — Верасень
&keywords = рыпяць, дарогах, вазы, верасень, мёдам, цяжкія
&abstract = Чытаць верш Сяргея Грахоўскага "Верасень"
&iftrue = nan
~~

====== Сяргей Грахоўскі — Верасень ======
І туманныя слівы і яблыкі – вось яны –\\
На саломе ляжаць у іскрынках расы,\\
Пахнуць мёдам і верасам сонечнай восені,\\
I рыпяць па дарогах цяжкія вазы.\\
\\
Халадком задыміліся травы збуялыя.\\
З агародаў паўзуць праз платы гарбузы,\\
Шамаціць на іржэўніку лісце апалае,\\
І рыпяць па дарогах цяжкія вазы,\\
\\
Аж здаецца, зямля пацяжэла за верасень,\\
Падабрэла, прыціхла ў асенняй красе.\\
Чалавек ёй з маленства да скону даверыўся, –\\
Пра яе і турботы, і клопаты ўсе.\\
\\
I яна адарыла пладамі багатымі\\
Працавітыя рукі шчаслівых людзей.\\
Чырванеюць рабіны над новымі хатамі,\\
Спелы верасень з мёдам і хлебам ідзе.

 


===== Падобныя старонкі =====
  * [[творы/сяргей-грахоўскі/сяргей-грахоўскі-стары-млын]]
  * [[постаці/сяргей-грахоўскі]]
  * [[творы/сяргей-грахоўскі/сяргей-грахоўскі-прызнанне]]
  * [[творы/сяргей-грахоўскі/сяргей-грахоўскі-мама]]
  * [[творы/сяргей-грахоўскі/сяргей-грахоўскі-чалавеку-патрэбна-не-сл]]