~~META:
title = Сяргей Грахоўскі — Ахвяры
&keywords = непахаваных, Курапаты
&abstract = Чытаць верш Сяргея Грахоўскага "Ахвяры"
&iftrue = nan
~~

====== Сяргей Грахоўскі — Ахвяры ======
Ахвяры лічым на мільёны\\
I ўсіх не можам палічыць,\\
Бо век зламаны і шалёны\\
Пакуль нічым не залячыць.\\
\\
Не гояцца старыя раны,\\
I яшчаркі шукаюць спрат\\
У чарапах непахаваных\\
Яшчэ з тае вайны салдат.\\
\\
А іх дасюль чакаюць маці,\\
«Без вестак» страчаных сыноў,\\
Ні месца ім няма на свяце,\\
Ні пенсіі, ні мірных сноў.\\
\\
Бязгучна ў апусцелых хатах\\
Яшчэ жыве нязводны страх\\
I плач па тых, што ў Курапатах\\
Закончылі апошні шлях.\\
\\
О, колькі іх, непахаваных\\
I не акропленых слязой,\\
Навекі юных і каханых\\
Пад мохам і пад дзеразой.\\
\\
Ніхто ахвяр не злічыць зроду,\\
З маленства кінуты на звод\\
Дзяцей тых «ворагаў народа»,\\
Што так любілі свой народ.\\
\\
З пустых вачніцаў Курапаты,\\
Як і даўней, у гэты час\\
Глядзяць з трывогаю, што каты\\
Усё яшчэ цікуюць нас.\\
\\
\\
11 верасня 1990 г.

 


===== Падобныя старонкі =====
  * [[творы/генадзь-бураўкін/генадзь-бураўкін-курапаты]]
  * [[творы/алесь-звонак/алесь-звонак-курапаты]]
  * [[творы/максім-танк/максім-танк-курапаты]]
  * [[творы/васіль-быкаў/васіль-быкаў-жоўты-пясочак]]
  * [[творы/сяргей-грахоўскі/сяргей-грахоўскі-вечная-памяць]]