~~META:
title = Станіслаў Шушкевіч — Красавік
&keywords = ідзе, пралескамі, праталінах, полем, красавік, лужынах, лесам, абуджанай, пералескамі, зямлі, вясной
&abstract = Чытаць верш Станіслава Шушкевіча "Красавік"
&iftrue = nan
~~

====== Станіслаў Шушкевіч — Красавік ======
Полем, лесам, пералескамі,\\
Па зямлі, вясной абуджанай,\\
Красавік ідзе з пралескамі\\
Па праталінах і лужынах.\\
\\
Раўчукі гудуць напорыста,\\
Распусцілі вербы голейка,\\
На галінцы ціхім посвістам\\
Шпак вітае рана сонейка.\\
\\
За дарогай, за прысадамі\\
Млын грукоча гулам-гоманам,\\
Там жаўрук дадолу падае\\
У быльнёг сухі, паломаны.\\
\\
Дзе сасна расце высокая\\
Па-над рэчкай гаманліваю,\\
Бусел радуе нас клёкатам,\\
Прыляцеўшы з далеч-выраю.\\
\\
I дарогамі і трактамі,\\
Наўздагонкі нібы гоняцца,\\
Плуг бяжыць за гонкім трактарам,\\
Ажно поле гулам поўніцца.\\
\\
Полем, лесам, пералескамі,\\
Па зямлі, вясной абуджанай,\\
Красавік ідзе з пралескамі\\
Па праталінах і лужынах.

 


===== Падобныя старонкі =====
  * [[творы/станіслаў-шушкевіч/станіслаў-шушкевіч-свавольнікі]]
  * [[творы/станіслаў-шушкевіч/станіслаў-шушкевіч-камарык]]
  * [[творы/станіслаў-шушкевіч/станіслаў-шушкевіч-па-лісточку-поўзаў-см]]
  * [[творы/станіслаў-шушкевіч/станіслаў-шушкевіч-верабейка]]
  * [[творы/станіслаў-шушкевіч/станіслаў-шушкевіч-знатныя-лісічкі]]