~~META:
title = Станіслаў Шушкевіч — Звярыны стадыён
&keywords = роўныя, другі, сіле, мядзведзь, ваўкі, брава, стадыён
&abstract = Чытаць верш Станіслава Шушкевіча "Звярыны стадыён"
&iftrue = nan
~~

====== Станіслаў Шушкевіч — Звярыны стадыён ======
На стадыён каля ракі\\
Вясёлым раннем з бору\\
Прыбеглі вёрткія ваўкі –\\
Адважныя баксёры.\\
\\
Прыджгалі з пушчы тры зубры,\\
І лось наставіў рогі.\\
Трох першых выбралі ў журы,\\
Мядзведзь суддзёй быў строгім.\\
\\
На рынг выходзяць два ваўкі\\
Ў баксёрскіх рукавіцах,\\
Крычаць ад радасці дзікі:\\
– Глядзіце, будуць біцца!\\
\\
Па сіле роўныя дружкі,\\
Вага ў іх адной меры,\\
Адзін зрабіў удар цяжкі,\\
Другі як доўбняй перыць.\\
\\
– Ура, браточкі! Брава! Брава!\\
Бі мацней! Лупі ямчэй! –\\
Воўчая раве арава,\\
Не спускае з іх вачэй.\\
\\
Чуваць удары: бах ды бах!\\
Два роўныя па сіле...\\
Знайшлася моц і ў іх зубах –\\
Па разу укусілі.\\
\\
Суддзя-мядзведзь тут не стрываў.\\
За праўду стаў гарою\\
І так па шыі моцна даў –\\
Зваліліся героі.\\
\\
Пасля хваціў іх за хвасты\\
І за канат шпурляе,\\
Адзін самлеў, абняў кусты,\\
Другі ля пня кульгае.\\
\\
Ля мікрафона стаў мядзведзь:\\
– Расходзьцеся дадому!..\\
А вось такіх баксёраў мець\\
Не раю я нікому.\\
\\
Усё спынілася уміг.\\
Было нямала смеху,\\
І стадыён замёр, заціх\\
Для многіх на пацеху.

 


===== Падобныя старонкі =====
  * [[творы/станіслаў-шушкевіч/станіслаў-шушкевіч-знатныя-лісічкі]]
  * [[творы/станіслаў-шушкевіч/станіслаў-шушкевіч-свавольнікі]]
  * [[творы/станіслаў-шушкевіч/станіслаў-шушкевіч-камарык]]
  * [[творы/станіслаў-шушкевіч/станіслаў-шушкевіч-па-лісточку-поўзаў-см]]
  * [[творы/станіслаў-шушкевіч/станіслаў-шушкевіч-верабейка]]