~~META:
title = Рыгор Ігнаценка — Цецерукі на бярозах
&keywords = хлопчык, унучак, птушкі, снезе, бярозах, цецерукі
&abstract = Чытаць апавяданне Рыгора Ігнаценкі "Цецерукі на бярозах"
&iftrue = nan
~~

====== Рыгор Ігнаценка — Цецерукі на бярозах ======
Па дарозе ўздоўж лесу едуць сані. Канём кіруе старэнькі дзядок.\\
Побач з ім сядзіць хлопчык. Раптам ён, зацікаўлены, аж падаецца наперад, ажыўляецца:\\
– Дзядуля, што гэта за птушкі на бярозах сядзяць?\\
– Цецерукі, унучак.\\
– А чаму іх ніхто не паловіць, такіх прыгожых?\\
– Гэта, унучак, надзвычай асцярожныя птушкі, – тлумачыць дзед. – Нашто ўжо ястраб добры лятун, а і той не можа цецерукоў у палёце дагнаць.\\
– А што яны робяць на дрэвах?\\
– Кормяцца.\\
– Чым?\\
– Бярозавымі пупышкамі. Калі няма нічога лепшага, то і гэтаму рад будзеш.\\
– А дзе яны хаваюцца, як ноч прыйдзе?\\
– У снезе, унучак.\\
– У снезе?! – здзіўляецца хлопчык, не разумеючы, як можна спаць у снезе.\\
– Надвячоркам апусцяцца чародкай дзе-небудзь на лясной палянцы, закапаюцца ў пульхны снег дый паснуць.\\
– І не холадна ім?\\
– Лепей, чым на голым суку, на марозе. Зацішней як-ніяк.\\
Хлопчык з цікавасцю ўглядаецца ў цецерукоў на белых бярозах. Што за прыгожыя птушкі! Самі чорныя, бы той вугаль, бровы чырвоныя. На крылах быццам люстэркі срэбныя блішчаць.\\
Вось яны пачулі гамонку і з шумам сарваліся з бяроз. Вялікія, зграбныя, таропка ляцяць над белым полем. А хлопчык як зачараваны глядзіць ім услед.

 


===== Падобныя старонкі =====
  * [[творы/янка-брыль/раман-янкі-брыля-птушкі-і-гнёзды-вобраз-]]
  * [[творы/янка-брыль/увесь-свет-адзін-дом-па-раману-янкі-брыл]]
  * [[творы/янка-брыль/птушкі-i-гнёзды-гнёзды-за-дымам-аповесць]]
  * [[ibdc.ped>цецерукі]]
  * [[творы/янка-брыль/птушкі-i-гнёзды-сцюдзёны-вырай-аповесць-]]