~~META:
title = Рыгор Ігнаценка — Птушка-нарушка
&keywords = сяргейка, норка, птушка, жывуць, птушак, мышыная, каменка, капаюць
&abstract = Апавяданне Рыгора Ігнаценкі "Птушка-нарушка"
&iftrue = nan
~~

====== Рыгор Ігнаценка — Птушка-нарушка ======
Іду аднаго разу па вуліцы, а насустрач – Сяргейка, суседскі хлапчук. Спыніўся і раптам запытаў мяне:\\
– Якія птушкі ў норках жывуць?\\
– Ластаўкі-беражанкі, – здзіўлены яго пытаннем, адказаў я.\\
– Не, гэта была не ластаўка.\\
– Можа, зімародак?\\
– А які ён?\\
– Спінка блакітная, куртаты хвост, доўгая дзюба.\\
– Не, – крутнуў галавой Сяргейка.\\
– Тады, можа, шчурка? – гадаю я. – Рыжавата-сіняя птушка, велічынёй са шпака.\\
– Гэта меншая, з вераб’я, – падказаў Сяргейка.\\
– Няма ў нас болей птушак, якія б вяліся ў норках.\\
– Ёсць, – не пагаджаецца Сяргейка. – Я ж бачыў яе.\\
Што ж гэта за птушка такая? Мяне самога пачала разбіраць цікаўнасць. І я папрасіў:\\
– Пакажы, дзе яна жыве.\\
Сяргейка падвёў мяне да кучы камянёў побач дарогі і паказаў норку пад імі.\\
– Э-э-э, мышыная, – махнуў я рукой.\\
– Не мышыная, а птушкі-нарушкі, – пярэчыў Сяргейка.\\
Прыселі на зямлю зводдаль, чакаем гаспадыню норкі. Хто яна, мышка ці птушка? Я ўпэўнены, што мыш. Сядзім і моўчкі на нару пазіраем. Падлятае, бачым, шэрая птушачка з чарвячком у дзюбцы. Паскакала на камені, пабліскваючы белым надхвосцем, і – шусь у норку!\\
– Там у яе, – шапчу, – маленькія дзеці. А ведаеш, як завуць яе? Каменка.\\
– А вы ж казалі, што няма болей птушак, якія ў норках жывуць.\\
– Самі каменкі норак не капаюць, – пачаў тлумачыць я. – Капаюць ластаўкі-беражанкі, зімародкі і шчуркі. Гэтая ж каменка, бачыш, упадабала мышыную норку. Любіць віць гнёзды ў крушнях – кучах камянёў, за гэта і завуць яе каменкай.\\
Сяргейка паслухаў і кажа:\\
– А я буду зваць яе птушкай-нарушкай.\\
– Што ж, няхай сабе будзе нарушкай, – пагадзіўся я. – Толькі не чапай яе, не палохай, у гняздзечку – птушаняткі.

 


===== Падобныя старонкі =====
  * [[ibdc.ped>у-вясеннім-небе]]
  * [[ibdc.ped>песня-птушкі]]
  * [[творы/васіль-жуковіч/васіль-жуковіч-птушыная-мова]]
  * [[творы/авяр-ян-дзеружынскі/авяр-ян-дзеружынскі-птушыныя-напевы]]
  * [[ibdc.ped>уладар-начной-пушчы]]