~~META:
title = Рыгор Ігнаценка — Незвычайны грыбнік
&keywords = толік, палянка, хлопчык, грыбоў, грыбнік
&abstract = Чытаць апавяданне Рыгора Ігнаценкі "Незвычайны грыбнік"
&iftrue = nan
~~

====== Рыгор Ігнаценка — Незвычайны грыбнік ======
Кожны грыбнік мае свае мясціны ў лесе. Меў такую і Толік. Гэта была невялічкая светлая палянка сярод лесу. На ёй рос тоўсты дуплаваты дуб. У дупле вяліся круцігалоўкі, і хлопчык часта назіраў, як птушкі кармілі сваіх дзяцей.\\
На палянцы кожны год расло шмат баравікоў, падасінавікаў, падбярозавікаў, суравежак. Аббяжыць Толік раненька сваю мясцінку, глядзіш – повен кошык грыбоў, маладзенькіх, крамяных. Не паспее маці ў печы выпаліць, а сын ужо дома з грыбамі.\\
Аднойчы прыбег ён на палянку, аж бачыць – адны толькі карэньчыкі валяюцца. Толік здзівіўся: «Хто ж гэта раней за мяне прыходзіў?» І падумаў, што, мабыць, малыя дзеці. Бо школьнікі не стануць вырываць корань з зямлёю, каб не пашкодзіць грыбніцу.\\
Праз два дні Толік зноў прыбег на знаёмую палянку. Грыбоў яшчэ ніхто не чапаў. І хлопчык пачаў збіраць іх у кошык.\\
Але вось нешта зашастала ў арэхавым кусце. Толік сцішыўся за тоўстым дрэвам: дай, думае, пагляджу, што за грыбнік ідзе.\\
І раптам высунулася вялізная галава з разгалістымі рагамі.\\
«Ло-ось», – шапнуў хлопчык і сцяўся ўвесь.\\
Звер выйшаў на палянку, сцепануўся, фыркнуў, панюхаў паветра і ўзяўся збіраць грыбы. Вырве тоўстымі губамі з зямлі, адкусіць мяккую шапачку, а корань адкіне.\\
Толік не стаў пужаць лася, хоць і шкада было грыбоў. Такога незвычайнага грыбніка хлопчык бачыў упершыню.

 


===== Падобныя старонкі =====
  * [[творы/еўдакія-лось/жыццёвы-і-творчы-шлях-еўдакіі-лось]]
  * [[творы/еўдакія-лось/еўдакія-лось-зайчык-выхваляйчык]]
  * [[творы/еўдакія-лось/еўдакія-лось-казка-пра-ласку]]
  * [[творы/еўдакія-лось/еўдакія-лось-уцякач]]
  * [[творы/еўдакія-лось/еўдакія-лось-маці]]