~~META:
title = Рыгор Ігнаценка — Лесавічок
&keywords = васілёк, абед, бацьку, курапатак, кармушкі, грэчку, падышлі, буданчыка, снег
&abstract = Апавяданне Рыгора Ігнаценкі "Лесавічок"
&iftrue = nan
~~

====== Рыгор Ігнаценка — Лесавічок ======
Палявалі мы ў гэты дзень на багатых дзічынай Валожынскіх перавалах. Заблудзіўшы ў лесе, я не менш быў рады сустрэчы з чалавекам, чым Рабінзон Круза на пустэльным востраве.\\
І вось такая сустрэча адбылася. З-за павароту лясной дарогі выкаціўся насустрач мне гадоў дзевяці хлапчук. Ён быў у чорных валёнках і насунутай на вочы вушанцы. Усім сваім выглядам ён нагадваў таёжнага мужычка-лесавічка.\\
– Як мне адгэтуль, хлопчык, у Зялёнае Вяззе трапіць? – пытаю я.\\
– Пойдзем, пакажу, – упэўнена, як бывалы чалавек, адказаў ён.\\
Па дарозе я даведаўся, што Васілёк – так звалі майго новага знаёмага – сын лесніка, які жыве недалёка адгэтуль.\\
– Напэўна, абед бацьку ў лес нясеш? – пацікавіўся я, заўважыўшы ў руцэ хлопчыка маленькую кужэльную торбачку.\\
– Не, – адказаў ён. – Абед, але не бацьку.\\
– А каму ж?\\
– Курапаткам.\\
– А ці многа курапатак да тваёй кармушкі прылятае? – пытаюся ў хлапчука.\\
– Штук пятнаццаць.\\
– І што ж ты ім даеш?\\
– Усё тое, што і курам. Але асабліва яны грэчку любяць.\\
– Грэчку, кажаш?\\
– Нарасхват дзяўбуць!\\
За размовай мы не заўважылі, як падышлі да маленькага ляснога яра.\\
– Вось бачыце, колькі іх сабралася там, – паказаў Васілёк рукой наперад.\\
На схіле яра я ўбачыў з дзясятак натапыраных шэрых курапатак. Калі мы падышлі бліжэй, птушкі ўзняліся і паляцелі ўздоўж яра.\\
– Гэта яны вас спалохаліся, – растлумачыў Васілёк.\\
У яры, пад кустамі алешніку, я заўважыў некалькі маленькіх буданчыкаў.\\
– Гэта такія кармушкі? – здзівіўся я. – А хіба не ўсё роўна: у такую кармушку сыпаць ці проста на снег?\\
– Вядома, не. Корм снегам не так замятае.\\
Мне нічога не заставалася, як згадзіцца. Адышоўшы з паўсотні крокаў, я азірнуўся. Маленькі лесавічок сыпаў у адзін з буданчыкаў прынесены птушкам корм.

 


===== Падобныя старонкі =====
  * [[творы/янка-брыль/птушкі-i-гнёзды-гнёзды-за-дымам-аповесць]]
  * [[ibdc.ped>птушкі-шчасця]]
  * [[творы/янка-брыль/раман-янкі-брыля-птушкі-і-гнёзды-вобраз-]]
  * [[творы/янка-брыль/птушкі-i-гнёзды-сцюдзёны-вырай-аповесць-]]
  * [[творы/янка-брыль/увесь-свет-адзін-дом-па-раману-янкі-брыл]]