~~META:
title = Цудадзейнае дрэва
&keywords = сокам, голас, шукаюць, дзятлам, вясною, вясновым, дзірачку, дзятлы, дрэва, птушкі
&abstract = Чытаць апавяданне Рыгора Ігнаценкі "Цудадзейнае дрэва"
&iftrue = nan
~~

====== Цудадзейнае дрэва ======
У вясновым лесе прыемна пахне свежай хвояй і першымі краскамі.\\
Я прыхіліўся спіною да маладой асінкі і назіраю за дзятлам, які ласуецца на бярозцы салодкім сокам.\\
Птах прадзёўбвае ў белай кары дзірачку, і калі адтуль пачынаюць бегчы буйныя слязінкі бярозавіку, бярэ адну з іх у дзюбку, цікаўна схіляе набок галоўку ў малінавай цюбецейцы і смакуе – салодкі ці не? Праглыне кроплю-другую, пасоўваецца ўбок і пачынае новую дзірачку рабіць, быццам спадзеючыся, што тут сок можа быць іншага гатунку.\\
Вясною дзятлы часта ласуюцца бярозавым сокам, і не на адным дрэве, а на розных. Гэта свавольства птушак натуралісты называюць вясновым кальцаваннем бяроз, прыпісваючы дзятлам шкоду. Што ж да лірыкаў, то яны зусім інакш гэта тлумачаць.\\
Амаль усе птушкі маюць свой голас, і вясною хто як можа спявае, вясну-прыгажуню славіць. I хоць дзятлы сваім барабанным пошчакам, як вядома, не апошнюю ролю адыгрываюць у гэтым веснавым канцэрце, але усё ж не тое, што дразды ці заранкі, тым болей салаўі. Вось быццам бы яны кожную вясну і шукаюць тое адзінае дрэва, сокам якога б можна было адрадзіць свой уласны голас.\\
Вось і на гэты раз бярозка, на жаль, аказалася не той. Дзяцел незадаволена цыкнуў і таропка пераляцеў на суседнюю.\\
А можа, гэта, нарэшце, і ёсць тое цудадзейиае дрэва, якое птушкі доўгі час шукаюць, ды ніяк знайсці не могуць?

 


===== Падобныя старонкі =====
  * [[творы/рыгор-ігнаценка/рыгор-ігнаценка-дупляначка]]
  * [[творы/рыгор-ігнаценка/рыгор-ігнаценка-ганарлівая-птушка]]
  * [[творы/рыгор-ігнаценка/рыгор-ігнаценка-ягады-пад-снегам]]
  * [[творы/рыгор-ігнаценка/рыгор-ігнаценка-вясна-ідзе]]
  * [[творы/рыгор-ігнаценка/рыгор-ігнаценка-грыбнік]]