~~META:
title = Рух часу
&keywords = сарочына, лесе, гняздо, хмызняку
&abstract = Чытаць апавяданне Рыгора Ігнаценкі "Рух часу"
&iftrue = nan
~~

====== Рух часу ======
Вясною мяне заўсёды ахоплівае нейкае незразумелае хваляванне. Усё мне здаецца, быццам я нешта прагледжу цікавае. Таму, як толькі выпадзе калі свабодная хвіліна-другая, спяшаюся ў лес на спатканне з прыродай.\\
Вось і гэтай веснавой раніцай крочыў я паволі знаёмай сцежкай.\\
I вось дзіва, колькі разоў тут праходзіў і не заўважаў цёмнай плямы ў хмызняку.\\
Няўжо, думаю, елачка пазелянела і раптоўна з шэрага хмызняку вытаркнулася?\\
Падыходжу бліжэй. А гэта, гляджу, сарочына гняздо. Зазірнуў у яго – пуста. Значыць яшчэ рана, няма яек.\\
Блукаючы па веснавым лесе, я ўвесь час здзіўляўся: колькі змен адбылося за ноч у прыродзе? Учора, мабыць, з паўгадзіны шукаў на палянцы воўчае лыка, ды так ніводнага кусціка з кветкамі і не знайшоў. А гэта ступіў на палянку і спыніўся ад здзіўлення – там і сям на ёй ружавелі галінкі квітнеючай расліны. А крыху воддаль, на ўгрэве, першыя пралескі заблакітнелі. Надвячоркам, адыходзячы з лесу, я на бярозу пусты слоік павесіў. А сёння ён ужо да берагоў напоўнены празрыстым бярозавікам. На краю буйны мураш сядзіць і салодкім напіткам ласуецца.\\
На зваротным шляху зноў успомнілася сарочына гняздо.\\
Зазіраю, а там – о цуд! – ужо яечка ляжыць. Да таго ж яшчэ цёпленькае. Відаць, сарока толькі што яго знесла, але калі заўважыла маё набліжэнне, непрыкметна зляцела з гнязда.\\
Які імклівы рух часу ў вясновым лесе! Гэта толькі за адну гадзіну такія змены адбыліся. А колькі ж іх адбудзецца за дзень, тыдзень, месяц?\\


 


===== Падобныя старонкі =====
  * [[творы/рыгор-ігнаценка/рыгор-ігнаценка-ягады-пад-снегам]]
  * [[творы/рыгор-ігнаценка/рыгор-ігнаценка-дупляначка]]
  * [[творы/рыгор-ігнаценка/рыгор-ігнаценка-ганарлівая-птушка]]
  * [[творы/рыгор-ігнаценка/рыгор-ігнаценка-вясна-ідзе]]
  * [[творы/рыгор-ігнаценка/рыгор-ігнаценка-грыбнік]]