~~META:
title = Першы раўчук
&keywords = таропка, дуба, вінь-цюнь-цінь, дзінь-лінь
&abstract = Чытаць апавяданне Рыгора Ігнаценкі "Першы раўчук"
&iftrue = nan
~~

====== Першы раўчук ======
У глыбіні заваленага снегам лесу яшчэ ўладарыць зіма. А тут, на ўзлессі, яе перамагло ужо сонца.\\
Каля магутнага дуба, што велічна стаіць на пагорку, бруіцца раўчук. Хоць яшчэ зусім маленькі і нясмелы.\\
Празрысты струмень вады, які выбіваецца аднекуль з-пад белай падушкі халоднага снегу, таропка перакочваецца цераз гарбаты корань дрэва, срабрыстай змейкай паблісквае на яркім сакавіцкім сонцы і таропка падае ў равок пад дубам.\\
Тонкія галінкі арэшніку, на якія трапляла вада, пакрыліся на марозе празрыстым лёдам. Яны зябка трымцяць, б’юцца адна аб адну. I каля дуба чуваць ледзьве ўлоўны для слыху тонкі крыштальны звон: дзінь-лінь, дзінь-лінь...\\
Першай гэта мілагучнае пазвоньванне пачула жаўтагрудая сініца. Яна села на суседнюю галінку і, гулліва пазіраючы па баках, весела заспявала:\\
– Вінь-цюнь-цінь! Вінь-цюнь-цінь!..\\
На сваёй птушынай мове яна паведамляла аб тым, што вось тут, менавіта пад гэтым волатам-дубам, парадзілася вясна.

 


===== Падобныя старонкі =====
  * [[творы/рыгор-ігнаценка/рыгор-ігнаценка-ягады-пад-снегам]]
  * [[творы/рыгор-ігнаценка/рыгор-ігнаценка-ганарлівая-птушка]]
  * [[творы/рыгор-ігнаценка/рыгор-ігнаценка-дупляначка]]
  * [[творы/рыгор-ігнаценка/рыгор-ігнаценка-грыбнік]]
  * [[творы/рыгор-ігнаценка/рыгор-ігнаценка-вясна-ідзе]]