~~META:
title = Малінаўка
&keywords = хвоі, пяюха, песню, пачуць, зарасніку, густой, сонца, малінавак, маладым
&abstract = Чытаць апавяданне Рыгора Ігнаценкі "Малінаўка"
&iftrue = nan
~~

====== Малінаўка ======
У маладым хвойнічку, які густой шчоткай тапырыцца пад старымі разлапістымі хвоямі, пахне адталай зямлёю і леташнімі шышкамі.\\
На адкрытым месцы – на полі ці на лузе – ужо світае. А тут, у лясным гушчары, цемень-цеменню, хоць вока выкалі.\\
Між тым веснавы лес паволі абуджаецца. Вось дзесьці побач нешта варухнулася. Гэта, відаць, шэры дрозд прачнуўся. Спрасонку пацягнуўся і гайдануў галінку. Шчоўкнуў сухі ліст, якім мышка-нарушка на дзень сваю адтуліну-схованку закрыла. Ціха рыпнула соннае дрэва, таксама прачнулася.\\
Нечакана над галавой уверсе пачуўся першы гук. Такі светлы, празрысты. Здавалася, быццам крышталінка сарвалася з вершаліны хвоі.\\
Гэта заспявала лясная малінаўка. Непадалёку – азвалася другая такая ж пяюха, трэцяя. Неўзабаве спяваў увесь хвойнік.\\
У прасвеце густой хвоі заружавелі кавалачкі неба. Мяккай пазалотай засвяціўся ўверсе ствол векавой хвоі.\\
Узышло веснавое сонейка.\\
Птушкі сустрэлі ў верхавінах дрэў усход сонца і зараз жа спусціліся ўніз, каб ужо тут, у густым зарасніку падлеска, даспяваць свае хвалюючыя песні.\\
А вось і мая пяюха. Птушачка зусім блізка і бязгучна пачынае кружыцца вакол мяне. Вочы ў яе чорныя, вялікія. Спінка і крыльцы пясчана-шэрыя, грудка цагляна-чырвонага колеру. Быццам на ёй яркая ранішняя зара адбілася. Нездарма ж мой стары знаёмы ляснік Зміцер інакш малінавак не заве як зоркамі.\\
Шмат вясною малінавак спявае ў нашых беларускіх лясах. Усюды – у старым і маладым лесе, на ўзлессі, у балоце, нават у зарасніку альхі з вербалозам – можна пачуць іх мілую сэрцу песню. Песню празрыстую, як крынічны ручаёк, маляўнічую, як ранішнія веснавыя заранкі.\\
Калі вы пажадаеце пабачыць гэту цудоўную веснавую пяюху і пачуць яе чароўны спеў, то прыходзьце ў лес на досвітку альбо на захадзе сонца. Днём жа, нават у самыя пагодлівыя ціхія дні, калі ўсё жывое наўкол весяліцца і гамоніць на розныя галасы, яе не пачуеце.

 


===== Падобныя старонкі =====
  * [[творы/рыгор-ігнаценка/рыгор-ігнаценка-грыбнік]]
  * [[творы/рыгор-ігнаценка/рыгор-ігнаценка-вясна-ідзе]]
  * [[творы/рыгор-ігнаценка/рыгор-ігнаценка-ганарлівая-птушка]]
  * [[творы/рыгор-ігнаценка/рыгор-ігнаценка-ягады-пад-снегам]]
  * [[творы/рыгор-ігнаценка/рыгор-ігнаценка-дупляначка]]