~~META:
title = Лістапад
&keywords = скідаюць, долу, лістапад, лісце, паволі, лесе
&abstract = Чытаць эцюд Рыгора Ігнаценкі "Лістапад"
&iftrue = nan
~~

====== Лістапад ======
У лесе лістапад. Стракатыя дрэвы з хмызнякамі паволі скідаюць долу свой дарагі асенні ўбор.\\
Хораша ў гэты час прысесці дзе-небудзь на сухі пянёк альбо бураломіну і паназіраць за гэтай прывабнай урачыстасцю ў прыродзе.\\
Вось з бярозкі адзін жоўты лісток вінтом да зямлі ўкручваецца. Другі, паскараючы абароты, валікам па паветры коціцца. Трэці матыльком пырхае над парыжэлай травою, доўга выбіраючы сабе месца. А гэты, буры, лёгкім галубком пераляцеў усю прасторную палянку і паволі апусціўся ў канцы яе пад чырвоны куст брызгліны.\\
У розных дрэў па-рознаму лісце ападае.\\
Ясені скідаюць лісце зялёнае – быццам тыя цацачныя драбінкі з блакітнага неба злятаюць долу.\\
Ёсць свае асаблівасці ў асіны, дуба, рабіны. Няма лістоў, якія б аднолькава ападалі. Колькі б іх ні было ў лесе – і кожны з іх па-свойму з асенняй зямлёю сустракаецца.

 


===== Падобныя старонкі =====
  * [[творы/рыгор-ігнаценка/рыгор-ігнаценка-ганарлівая-птушка]]
  * [[творы/рыгор-ігнаценка/рыгор-ігнаценка-дупляначка]]
  * [[творы/рыгор-ігнаценка/рыгор-ігнаценка-ягады-пад-снегам]]
  * [[творы/рыгор-ігнаценка/рыгор-ігнаценка-вясна-ідзе]]
  * [[творы/рыгор-ігнаценка/рыгор-ігнаценка-грыбнік]]