~~META:
title = Рыгор Крушына — Элегія
&keywords = Крушына, элегія
&abstract = Чытаць верш "Элегія" Рыгора Крушыны
&iftrue = nan
~~

====== Рыгор Крушына — Элегія ======
Бываюць, крый Божа, благія настроі...\\
Нацягнуцца струны на смутак і боль:\\
Заплача прырода, заплачуць героі,\\
У аўтара згубіцца строгі кантроль.\\
\\
Героі праходзяць тады непрыкметна,\\
Няма ў іх аблічча, прыгожай хады.\\
У творы лірычны радок непрыветна\\
Душу закране адгалоскам нуды.\\
\\
Людзкая душа не заўсёды спявае,\\
Пустым застаецца паперы лісток.\\
А дзе-ж ты, нататка мая чарнавая?\\
Я чую апошні сігнальны свісток.\\
\\
З газетнае хронікі злыя навіны:\\
Піраты ў паветры... Паўстанні... Разбой...\\
Ці можна смяяцца ў такія хвіліны?\\
Ці горкі настрой адпадзе сам сабой?\\
\\
Я ў смутку нямею на гэткім пытанні:\\
– Чаму часта плодзіцца зло на зямлі,\\
А людзі маўчаць у душэўным хістанні, –\\
Насупраць нічога зрабіць не змаглі.

 


===== Падобныя старонкі =====
  * [[творы/максім-багдановіч/не-кувай-ты-шэрая-зязюля]]
  * [[творы/максім-танк/максім-танк-ой-не-гніце-ветры]]
  * [[творы/аркадзь-куляшоў/аркадзь-куляшоў-элегія]]
  * [[творы/пімен-панчанка/пімен-панчанка-прысніўся-сон]]
  * [[слоўнік/элегія]]