~~META:
title = Рыгор Крушына — Твае вочы
&keywords = Крушына, вочы
&abstract = Чытаць верш "Твае вочы" Рыгора Крушыны
&iftrue = nan
~~

====== Рыгор Крушына — Твае вочы ======
Калісьці глыбока зірнуў табе ў вочы.\\
Зрабіў гэта добра, ці не?\\
Твой сонечны позірк – нявінны, дзявочы –\\
Спалохана ўцёк ад мяне.\\
\\
Уцёк, а чаму? Маё сэрца гадае,\\
Гадае даўгія гады.\\
Твой позірк жыве, дзесьці мне спагадае\\
I кліча-гукае... Куды?\\
\\
У тую краіну, дзе мелі спатканьні,\\
Дзе я захапляўся табой,\\
Дзе соладка-страшна было ў хваляваньні\\
I пальцы хрусьцелі мальбой.\\
\\
Былыя пачуцьці ўвайшлі ў катакомбы.\\
Мо лепш ня трывожыць сябе?\\
Тут прывідам, выбухам атамнай бомбы\\
Твой вобраз паўстаў у журбе.\\
\\
Зьбянтэжаны позірк – нявінны, дзявочы –\\
Калісьці уцёк ад мяне...\\
Навошта-ж цяпер мне далёкія вочы\\
Прыветна сьмяюцца ўва сьне.

 


===== Падобныя старонкі =====
  * [[постаці/рыгор-крушына]]
  * [[творы/рыгор-крушына/рыгор-крушына-чалавек]]
  * [[творы/рыгор-крушына/рыгор-крушына-тэрцыны]]
  * [[творы/рыгор-крушына/рыгор-крушына-секстына]]
  * [[творы/рыгор-крушына/рыгор-крушына-крушына]]