~~META:
title = Рыгор Крушына — Слова
&keywords = Крушына, слова
&abstract = Чытаць верш "Слова" Рыгора Крушыны
&iftrue = nan
~~

====== Рыгор Крушына — Слова ======
Шырокім спэктрам вычуваньня\\
Цябе я, слова, пазнаю.\\
I смак, і пах, і гукаў граньне,\\
I радасьць творчую маю,\\
\\
I розных хварбаў пералівы,\\
I маладосьці эліксір,\\
I залатыя нашы нівы,\\
I жар, і неспакойны вір —\\
\\
Я ўсё тут бачу, адчуваю,\\
Ствараю словам навіну.\\
Я чую голас майго краю,\\
Жывых эмоцыяў вайну.\\
\\
Узяць на смак, напрыклад, слова\\
Такое горкае — «палын».\\
Здаецца, вуліцай вясковай\\
Настой травы паўзе паўз тын.\\
\\
А нехта цэдзіць слоў рыцыну.\\
Ды ёсьць салодкія, як мёд...\\
Цябе я, слова, не пакіну, —\\
Люблю я твой крылаты ўзьлёт:\\
\\
Ты падымаеш чалавека\\
I ў сьвет загадваеш ісьці.\\
Ты лечыш хворага спрадвеку,\\
Б'еш злога ворага ў жыцьці.\\
\\
I зьзяеш яснай бліскавіцай,\\
I вееш цёплаю вясной...\\
Вянком па сьмерці будзеш віцца,\\
Гарэць агнём, жыцьцём і мной.

 


===== Падобныя старонкі =====
  * [[ibdc.ped>роднае-слова]]
  * [[творы/іншае/слова-пра-паход-ігаравы]]
  * [[ibdc.ped>цана-слова]]
  * [[слоўнік/слова]]
  * [[ibdc.ped>хто-ж-аўтар-слова-пра-паход-ігаравы]]