~~META:
title = Рыгор Крушына — Родныя гукі
&keywords = Крушына, родныя, гукі
&abstract = Чытаць верш Рыгора Крушыны "Родныя гукі"
&iftrue = nan
~~

====== Рыгор Крушына — Родныя гукі ======
Зноў абуджаюцца родныя гукі,\\
Я не самотны - натхненьне са мной.\\
Думка трывожная ў часе разлукі\\
Цягнецца звонкай ігранай струной.\\
\\
Слова, што ўладна і ладна ўплялося\\
Ў лёс мой, жыцьцё і пачуцьці мае, -\\
Як на палёх пад вятрамі калосьсе,\\
Бурнаю хваляю сёньня ўстае.\\
\\
Слова сьпявае. Палае. Чаруе.\\
Матчын запеў - нясуцішны - у ім.\\
Я пазнаю гэту праўду старую.\\
Сьвет, цэлы сьвет б'ецца ў сэрцы маім.\\
\\
Хочацца добрае ў песьню укласьці!\\
Я перажыў колькі сьветлых гадзін.\\
Слова мяне ратавала ў няшчасьці\\
I суцяшала, што я не адзін.\\
\\
Зноў я праходжу праз творчыя мукі,\\
I зацьвітаю вішнёвай вясной.\\
I абуджаюцца родныя гукі...\\
Я не самотны, бо слова са мной.

 


===== Падобныя старонкі =====
  * [[ibdc.ped>роднае-слова]]
  * [[слоўнік/слова]]
  * [[творы/рыгор-крушына/рыгор-крушына-слова]]
  * [[творы/іншае/слова-пра-паход-ігаравы]]
  * [[ibdc.ped>хто-ж-аўтар-слова-пра-паход-ігаравы]]