~~META:
title = Рыгор Крушына — Раманс
&keywords = няма, табой, цвітуць, табе, няўжо
&abstract = Чытаць "Раманс" Рыгора Крушыны
&iftrue = nan
~~

====== Рыгор Крушына — Раманс ======
Цябе няма. I раптам ты са мной.\\
Вясёлы смех і голас з цёплай ноткай.\\
I я з табой у сферы незямной\\
Ужо ляту ў хмялёвасці салодкай.\\
\\
Цудоўны сон. А досвіткам я ўстаў,\\
I цэлы дзень душа ў трывозе млее.\\
I памяць зноў згадала ціхі стаў,\\
Дзе расцвілі ласкавыя лілеі.\\
\\
Цвітуць, цвітуць гарлачыкі ў вадзе,\\
I качкі там нырцуюць ля чароту.\\
Няўжо мой лёс самоту прывядзе?\\
Няўжо няма дадому павароту?\\
\\
Я не магу да любае прыйсці.\\
Няма цябе, як радасці вясновай.\\
Пачну спяваць, каб сонечна ў жыцці\\
Было табе і мне пад песняй новай.\\
\\
Найлепшы час абое мы прыснiм,\\
I шчасце ў нас – на добрых аргументах.\\
З табой цяпер мы блізкія зусім,\\
Хоць і жывем на розных кантынентах.

 


===== Падобныя старонкі =====
  * [[постаці/рыгор-крушына]]
  * [[слоўнік/раманс]]
  * [[творы/максім-багдановіч/максім-багдановіч-раманс]]
  * [[творы/рыгор-крушына/рыгор-крушына-секстына]]
  * [[творы/алесь-салавей/алесь-салавей-раманс-няма-нідзе]]