~~META:
title = Рыгор Крушына — Пастараль
&keywords = далёкія, згадка, лашчыць
&abstract = Чытаць верш "Пастараль" Рыгора Крушыны
&iftrue = nan
~~

====== Рыгор Крушына — Пастараль ======
Згадка лашчыць далёкія дні.\\
Ціха ў лесе звіняць камары.\\
А на полі – сляпні, авадні...\\
У спякоце гараць папары.\\
\\
Я на ўзлессі сядаю на пень,\\
Там мурашкі таўкуцца ў карчы.\\
Песня, хваляй гарачай успень\\
Захапленне маё, і крычы.\\
\\
Мой запал не пагас, не патух –\\
Як паходню, вышэй падыму.\\
Чую – дзесьці спявае пастух,\\
Падпявае пастушка яму.\\
\\
Згадка лашчыць далёкія дні.\\
Паліць сонца і джгаліць сляпень.\\
Але мілы прытулак радні,\\
Але родная ўсюды цвіцень.\\
\\
Пугі ляск і рыканне кароў,\\
I ў паветры сухім – сырадой...\\
Зноў каханнем бунтуецца кроў,\\
Мае песні плывуць чарадой.

 


===== Падобныя старонкі =====
  * [[творы/рыгор-крушына/рыгор-крушына-крушына]]
  * [[творы/рыгор-крушына/рыгор-крушына-секстына]]
  * [[слоўнік/пастараль]]
  * [[творы/рыгор-крушына/рыгор-крушына-тэрцыны]]
  * [[постаці/рыгор-крушына]]