~~META:
title = Рыгор Крушына — Крушына
&keywords = Крушына
&abstract = Чытаць верш "Крушына" Рыгора Крушыны
&iftrue = nan
~~

====== Рыгор Крушына — Крушына ======
Расла крушына на Палесьсі.\\
Зьвінеў і цьвіў хмызьняк густы!\\
Азёрны шум блакітнай плесі\\
Прыносіў вецер праз кусты.\\
I войстры пах травы і цьвілі,\\
I воўчых ягад горкі сок\\
Паветра вогкае паілі,\\
Бы ў навальніцу дождж пясок.\\
Прырода шчодрая на ласку\\
Вітала птушняй песьняй бор,\\
Які складаў лясную казку\\
I разьвінаў жыцьця прастор.\\
Дый раптам сьціхла ўсё жывое.\\
Прыйшоў нядобры чалавек,\\
Ён залатыя спляжыў хвоі,\\
Дубы карэньністыя сьсек.\\
Ён вырваў дзікую крушыну\\
Зь лясной глушы і ў сад прынёс.\\
Няхай расьце там каля тыну,\\
Яе інакшай зробіць лёс.\\
Ажно дарэмныя надзеі!\\
На дзікі куст не пазірай!\\
Зямля чужая не сагрэе\\
Таго, хто любіць родны край.\\
Крушыне лес далёкі сьніцца,\\
Нядоляй нудзіцца сваёй.\\
I сьпеюць воўчыя чарніцы\\
Яшчэ гарчэйшыя на ёй.

 


===== Падобныя старонкі =====
  * [[творы/рыгор-крушына/рыгор-крушына-чалавек]]
  * [[творы/рыгор-крушына/рыгор-крушына-тэрцыны]]
  * [[творы/рыгор-крушына/рыгор-крушына-секстына]]
  * [[творы/рыгор-крушына/рыгор-крушына-рандо]]
  * [[постаці/рыгор-крушына]]