~~META:
title = Рыгор Крушына — Да цябе, дарагая
&keywords = смутак, твае, дарагая, толькі, цябе
&abstract = Чытаць Рыгора Крушыны "Да цябе, дарагая"
&iftrue = nan
~~

====== Рыгор Крушына — Да цябе, дарагая ======
Дзень нахмурыўся, плача і жаліцца.\\
Родзіць смутак. Сляза на вакне.\\
Чую – маці пяшчотнымі пальцамі\\
Ціха, прывідна лашчыць мяне.\\
\\
Сэрцу мірсціцца даўнае, роднае!\\
Толькі боль узрастае ўдвая:\\
За паўсветам, за далеччу воднаю\\
Ты гаруеш, матуля мая.\\
\\
Душыць крыўда... Ніякімі лекамі\\
Не загоіцца смутак душы.\\
Заспявай нашы песні, як некалі,\\
I за сына малітву скажы.\\
\\
Акіянскія горка-салоныя,\\
Перамерыўшы мілі, вятры\\
Прынясуць твае словы ў зялёныя\\
На ўзбярэжжы сады-гушчары.\\
\\
I як толькі ізноў распагодзіцца,\\
Я паеду за горад, і там –\\
У кляновых прысадах ваколіцы –\\
Тваё гора ссяку папалам.\\
\\
На гадзіну пазбаўлюся негадзі\\
Адзіноцтва, тугі і турбот...\\
Паплывуць мае думкі, як лебедзі,\\
Да цябе, дарагая, на ўсход.\\
\\
1953

 


===== Падобныя старонкі =====
  * [[творы/рыгор-крушына/рыгор-крушына-секстына]]
  * [[творы/рыгор-крушына/рыгор-крушына-крушына]]
  * [[постаці/рыгор-крушына]]
  * [[творы/рыгор-крушына/рыгор-крушына-тэрцыны]]
  * [[творы/рыгор-крушына/рыгор-крушына-чалавек]]