~~META:
title = Рыгор Крушына — Газэля
&keywords = мой, край
&abstract = Чытаць "Газэлю" Рыгора Крушыны
&iftrue = nan
~~

====== Рыгор Крушына — Газэля ======
Няўсцішна-горача люблю цябе, мой край.\\
Твой голас з далечы лаўлю ў журбе, мой край.\\
\\
Даўней не ведаў я, што хараством\\
Мяне пачнеш ты вабіць да сябе, мой край.\\
\\
Заклятым злом завязаны залом...\\
I маё сэрца памятку скубе: мой край!\\
\\
Згарэла маладосць, згарэў мой дом,\\
Але я захаваў жывым цябе, мой край.\\
\\
Паміж чужых не буду чужаком.\\
Куды я ні зірну – крыніцай б’е мой край.\\
\\
Хай адгукнецца роднае цішком:\\
На сціплых васількох і на вярбе – мой край.\\
\\
I кожнай цвет-галінкай і лістком\\
Крушына мне прыгадвае ў жальбе мой край.\\
\\
Яшчэ ў маленстве піў я з малаком\\
Тваёй пяшчоты мёд. Люблю цябе, мой край.

 


===== Падобныя старонкі =====
  * [[творы/рыгор-крушына/рыгор-крушына-чалавек]]
  * [[творы/рыгор-крушына/рыгор-крушына-крушына]]
  * [[творы/рыгор-крушына/рыгор-крушына-тэрцыны]]
  * [[постаці/рыгор-крушына]]
  * [[творы/рыгор-крушына/рыгор-крушына-секстына]]