~~META:
title = Рыгор Барадулін — Світанняў я з табой не сустракаў...
&keywords = світанняў, гарох
&abstract = Чытаць верш "Світанняў я з табой не сустракаў..." Рыгора Барадуліна
&iftrue = nan
~~

====== Рыгор Барадулін — Світанняў я з табой не сустракаў... ======
Світанняў я з табой не сустракаў,\\
Не рассякаў вяслом азёрнай хвалі.\\
I толькі ў хваляванні скуб рукаў,\\
Калі цябе да дошкі выклікалі.\\
\\
Здавалася, што бачыць увесь клас,\\
Калі ў твой бок глядзеў я незнарокам.\\
Каб аб сабе напомніць лішні раз,\\
Па пяць заўваг я зарабляў на ўроку.\\
\\
Што стала ты мне нейкаю другой,\\
Баяўся і сабе прызнацца ў гэтым.\\
Ды толькі ўсё чамусьці нас з табой\\
На кніжках плюсавалі без сакрэту.\\
\\
Ну, а калі кілометры за два\\
Дамоў з аднавяскоўцамі ішла ты,\\
Як крыўдна мне было, як я злаваў,\\
Што каля самай школы наша хата.\\
\\
Гады прайшлі. У кожнага свой шлях.\\
I апынуўся я не ў роднай хаце.\\
... З усмешкай палахлівай на губах\\
Я сніў цябе ў студэнцкім інтэрнаце.\\
\\
I вось нарэшце на лістах шасці\\
Прызнаўся я табе ў сваім каханні.\\
З трывогай “заказное” апусціў\\
I атрымаў адказ — тваё маўчанне.\\
\\
Дамоў прыехаў.\\
Кажуць, трэці дзень\\
Грыміць тваё вяселле (я ж не веру).\\
Вянок з гароху хочуць мне надзець\\
Сябры, як адстаўному кавалеру.\\
\\
Хай надзяюць — мне невялікі страх,\\
Я з гора нацягну з кілішка троху.\\
Дык пасядзім з табою у вянках,\\
Твой — з красак палявых, а мой — з гароху.\\
\\
... Хай снег гадоў асядзе ў валасах,\\
Хай будзе мне

хоць пяць разоў па дваццаць —

Усмешкай палахлівай на губах\\
Ты школьніцай мне будзеш усміхацца...

 


===== Падобныя старонкі =====
  * [[творы/анатоль-грачанікаў/анатоль-грачанікаў-свяці-кахання-чыстая-]]
  * [[творы/рыгор-крушына/рыгор-крушына-твае-вочы]]
  * [[творы/эдуард-акулін/эдуард-акулін-трыялет]]
  * [[творы/янка-журба/янка-журба-каханне]]
  * [[творы/язэп-пушча/язэп-пушча-яшчэ-ў-юнацкія-гады]]