~~META:
title = Рыгор Барадулін — Палын і чарнобыль
&keywords = чарнобыль, палын, браты
&abstract = Чытаць верш Рыгора Барадуліна "Палын і чарнобыль"
&iftrue = nan
~~

====== Рыгор Барадулін — Палын і чарнобыль ======
Палын і чарнобыль –\\
Браты з даўніны,\\
На пусташах і на руінах\\
Трывала карэнне пусцілі яны\\
Тубыльцамі ў родных краінах.\\
\\
Святлейшы ўспамінам\\
Палын-славянін,\\
Чарнейшы чарнобыль-татарын,\\
Адзін ласкавеў ля балючых былін,\\
Другі суравеў ля выгарын.\\
Яны – пагарэльцы\\
І сведкі вайны –\\
Па свеце вандруюць спрадвеку.\\
Іх лічаць сваімі паны-дзірваны,\\
Адводзяць ад іх небяспеку.\\
\\
Сівее ў сухмень,\\
Серабрыцца палын,\\
У лівень рунее маўкліва.\\
Здаецца, чарнобыль\\
Чакае свой клін,\\
Што з неба прывабіла ніва.\\
\\
Палын і чарнобыль,\\
І мне вы – радня,\\
Браты па малечай галечы.\\
Пясчанай каплічцы апошняга дня\\
Вы глуха атуліце плечы.

 


===== Падобныя старонкі =====
  * [[творы/пімен-панчанка/пімен-панчанка-аб-самым-смачным]]
  * [[творы/іншае/сучасная-літаратура-беларусі/тэма-чарнобыля-ў-беларускай-паэзіі]]
  * [[творы/мікола-мятліцкі/мікола-мятліцкі-санеты-чарнобыля]]
  * [[творы/алесь-пісьмянкоў/алесь-пісьмянкоў-1986]]
  * [[творы/артур-вольскі/артур-вольскі-боль-чарнобыля]]