Пакуль жывеш, развітвайся з жыццём
Штогодна, штогадзінна, штохвілінна,
Твой кожны дзень,
Забраны забыццём,
Лічы сваім найбольшым адкрыццём,
Ты – з дрэва часу
Кволая галіна.

Штодня вядзі з самім сабою бой,
Каб клопаты цябе не пахавалі,
Жыві надзеяй,
Мараю слабой,
Што свет трымаецца
Адным табой –
З ракі ўсёзабыцця – намерам хвалі.

Старайся не ў дзяльбе,
А ў малацьбе,
Каб вымалаціць з цемрачы праменне.
Ляж зморшчынкай
Ва ўсмешцы на ілбе,
Каб недзе ўспомніла жыццё цябе,
У незваротнай вечнасці –
Імгненне.

• сяргей-грахоўскі/сяргей-грахоўскі-казкі-жыцця
• сяргей-грахоўскі/сяргей-грахоўскі-бяссмерце
• леанід-галубовіч/леанід-галубовіч-дзяцінства-пачынаецца-з
• алесь-гарун/алесь-гарун-жыццё
• максім-багдановіч/максім-багдановіч-жывеш-не-вечна-чалавек