~~META:
title = Рыгор Барадулін — Мы толькі ходзім па зямлі...
&keywords = зорах, зямлі
&abstract = Чытаць верш Рыгора Барадуліна "Мы толькі ходзім па зямлі..."
&iftrue = nan
~~

====== Рыгор Барадулін — Мы толькі ходзім па зямлі... ======
Мы толькі ходзім па зямлі,\\
А думкі нашыя ў нябёсах.\\
I Млечны Шлях,\\
Як вечны посах,\\
Відзён з туманнай араллі,\\
\\
Каб не забыўся напамін,\\
Што зоры –\\
Нашых мар радзіма.\\
I зорамі вачэй глядзім мы\\
На зорны пыл былых сцяжын.\\
\\
Па зорах вызначаем лёс,\\
Па зорах на зямлі варожым.\\
I трызнім даўнім падарожжам,\\
Якім нізрынуты з нябёс.\\
\\
Перабіраюць нашы дні\\
Для памяці\\
Ружанец зораў,\\
I незямнога смутку жораў\\
Нас кліча ў вырай вышыні.

 


===== Падобныя старонкі =====
  * [[творы/рыгор-барадулін/творчасць-рыгора-барадуліна]]
  * [[творы/рыгор-барадулін/рыгор-барадулін-уцякала-зіма-ад-вясны]]
  * [[постаці/рыгор-барадулін]]
  * [[творы/рыгор-барадулін/рыгор-барадулін-світанняў-я-з-табой-не-с]]
  * [[творы/рыгор-барадулін/дзіцячая-паэзія-рыгора-барадуліна]]