~~META:
title = Рыгор Барадулін — Мая Бацькаўшчына
&keywords = твае, маладых, таленты
&abstract = Чытаць верш Рыгора Барадуліна "Мая бацькаўшчына"
&iftrue = nan
~~

====== Рыгор Барадулін — Мая Бацькаўшчына ======
З суседзямі падзелішся скарынкаю.\\
Адно не ўмееш з торбаю прасіць.\\
Як ластаўка,

з падстрэшша рук Скарынавых

Тваё крыляла слова па Русі...\\
\\
Ты бласлаўляла даланёй кляноваю\\
Сваіх сыноў.\\
Слязамі дабяла\\
Бяліла лён на світку Каліноўскаму\\
I ў сны Ўрублеўскага ты Нёманам плыла...\\
\\
Зеленакосымі, тугімі сеткамі\\
Злавіла Свіцязь юнакоў спакой.\\
Хоць ён пабраўся з песняю суседскаю,\\
Але вяснянкі не забыў тваёй...\\
\\
Люблю цябе

у веснавых праталінах,

У белай хустцы маладых снягоў.\\
Як на грыбы,

багата ты на таленты –

Пільней глядзі і нерушы знаходзь.\\
\\
Радзі, зямля, ты –

шчодрая і сціплая.

Каб толькі маразоў не знала рунь!\\
Імя тваё нашчадкам з нетраў выплыве –\\
Сівых стагоддзяў рэха:

– Бе-ла-русь!..

 


===== Падобныя старонкі =====
  * [[творы/алесь-бачыла/алесь-бачыла-радзіма-мая-дарагая]]
  * [[творы/алесь-разанаў/алесь-разанаў-радзіма]]
  * [[ibdc.ped>скарбы-нашай-радзімы]]
  * [[ibdc.ped>ганарымся-бацькаўшчынай]]
  * [[творы/янка-купала/тэма-народнага-жыцця-і-любоў-да-радзімы-]]