~~META:
title = Рыгор Барадулін — Зіма
&keywords = спяць, ходзіць
&abstract = Верш Рыгора Барадуліна "Зіма"
&iftrue = nan
~~

====== Рыгор Барадулін — Зіма ======
Гай маўчыць – лістоў няма,\\
даль азябла сіняя.\\
Зноў да нас прыйшла зіма\\
рупнай гаспадыняю.\\
\\
Вымела без памяла\\
поле з першапуткамі.\\
Хусту з галавы зняла,\\
рунь малую ўхутала.\\
\\
Суняла дачок-завей,\\
каб дарма не бегалі,\\
а вязалі, ды хутчэй,\\
рукавічкі белыя.\\
\\
Для ялінак- немаўлят,\\
для хваінак тоненькіх.\\
У зімы работы шмат:\\
ходзіць, ходзіць гонямі.\\
\\
Рассцілае абрусы,\\
дорыць шапкі цёплыя…\\
Спяць азёры, спяць лясы,\\
спяць стагі на поплаве.\\
\\
Спорыцца ўсё ў яе.\\
Неба распагодзіла.\\
Дзе парадку не стае,\\
дык ідзе ў абходзіны.

 


===== Падобныя старонкі =====
  * [[творы/кастусь-жук/кастусь-жук-беларуская-зіма]]
  * [[творы/ларыса-геніюш/ларыса-геніюш-на-каньках]]
  * [[творы/цішка-гартны/цішка-гартны-зімовы-вечар]]
  * [[творы/кастусь-жук/кастусь-жук-снежань]]
  * [[ibdc.ped>зімой-у-лесе]]