~~META:
title = Рыгор Барадулін — Дыпціх прысвячэння
&keywords = імшэюць, глушэюць
&abstract = Чытаць верш "Дыпціх прысвячэння " Рыгора Барадуліна
&iftrue = nan
~~

====== Рыгор Барадулін — Дыпціх прысвячэння ======
//Міхасю С.//

\\
**I**

Імшэюць нашыя дамы,\\
Прытулкі радасці,\\
Дзе мы\\
Саміх сябе пачуць хацелі.\\
Глушэюць нашыя грамы,\\
Што нас маглі\\
З глухой зімы,\\
Як тую рунь,\\
Падняць з пасцелі.\\
Цішэюць нашыя дымы —\\
Працяг зялёнае думы\\
Смалістай баравой арцелі.\\
Вайна перадала шрамы\\
Надскепам бліскавіц,\\
Траншэям.\\
Не верыцца, што гэта мы\\
Імшэем,\\
Глушэем,\\
Цішэем.\\
\\
**II**\\
Да грамніц пільнуйся рукавіц!\\
Ты азваўся свету на грамніцы.\\
За драты калючых бліскавіц\\
Браўся галаруч\\
I навальніцу\\
Запрашаў паслухаць цішыню,\\
Ды ў адказ і цішыня грымела.\\
Дазваляў пад сэрцам грэцца дню,\\
Перапісваў прызімак набела.\\
\\
Кідаў рукавіцу перуну,\\
Прэчыў асцярожнасці законы,\\
Пазычаў у пеўня пер'іну,\\
Смутны,\\
Неадумны,\\
Рызыкоўны,\\
Каб у сшытку неба\\
Млечны сказ\\
Перакрэсліць\\
I пачаць пра тое,\\
Як, ад нас уцёкшы,\\
Просіць час\\
У спагады даўняга пастою.\\
\\
Час каня забытнасці вядзе,\\
Прымярае кон\\
Старую збрую.\\
\\
На грамніцы дадзена вадзе\\
Зноў успомніць\\
Сілу маладую.

 


===== Падобныя старонкі =====
  * [[слоўнік/дыпціх]]
  * [[творы/рыгор-барадулін/творчасць-рыгора-барадуліна]]
  * [[творы/рыгор-барадулін/рыгор-барадулін-уцякала-зіма-ад-вясны]]
  * [[постаці/рыгор-барадулін]]
  * [[творы/рыгор-барадулін/рыгор-барадулін-світанняў-я-з-табой-не-с]]