~~META:
title = Рыгор Барадулін — Вятрак
&keywords = вятрак, ветру, сонца, батрак
&abstract = Чытаць верш Рыгора Барадуліна "Вятрак"
&iftrue = nan
~~

====== Рыгор Барадулін — Вятрак ======
Сонца і ветру батрак,\\
Стаіць на пагорку вятрак,\\
\\
Суседзі сваё адмахалі,\\
Адзін сірацее...\\
Пыльна.\\
Дзе ж гэта падводы з мяхамі?\\
Чакае, ўглядаецца пільна.\\
\\
Калі ж засклыгочуць восі!\\
Не чуць...\\
А начамі сніцца:\\
Каўшы засыпае восень –\\
Ён смачна хрумсціць пшаніцай...\\
\\
Махнуць журавам:

– Да сустрэчы!

Ён хоча, ды ўсё дарэмна.\\
Распяўся кажан у падстрэшшы.\\
Пугач вірлавокі дрэмле.\\
\\
А ў яго ж быў размах,\\
А ў яго ж, бывала.\\
Ранняя зіма сама\\
Пытлю пазычала.\\
\\
А глядзела ж на вятрак\\
Столькі воч з пашанай.\\
Ходзяць жорны – проста страх!\\
Быццам два паўшар'і.\\
\\
Зерне трушчыў дацямна.\\
Хмару браў пад паху, –\\
Азалелая, яна\\
Навальніцай пахла.\\
\\
Сонца і ветру батрак,\\
Сумуе самотны вятрак.\\
\\
1960\\
\\


Крыніца: Барадулін Р. Адам і Ева. Лірыка. – Мн.: «Беларусь», 1968. – 256 с.

 


===== Падобныя старонкі =====
  * [[творы/рыгор-барадулін/рыгор-барадулін-світанняў-я-з-табой-не-с]]
  * [[творы/рыгор-барадулін/рыгор-барадулін-уцякала-зіма-ад-вясны]]
  * [[постаці/рыгор-барадулін]]
  * [[творы/рыгор-барадулін/творчасць-рыгора-барадуліна]]
  * [[творы/эдуард-валасевіч/эдуард-валасевіч-вятрак-і-гусак]]