~~META:
title = Рыгор Барадулін — Беларусь на крыжы
&keywords = беларусь, крыжы
&abstract = Чытаць верш Рыгора Барадуліна "Беларусь на крыжы"
&iftrue = nan
~~

====== Рыгор Барадулін — Беларусь на крыжы ======
А стараліся дружна і свой і чужы\\
На здранцвелым, на востракутым\\
Небу роўную маці распяць на крыжы\\
I аддаць Беларусь пакутам.\\
\\
У старэйшых хацелі хадзіць браты,\\
Выракаліся быць крывічамі.\\
I суседзі сціскалі ў злосці раты,\\
Усміхаліся толькі мячамі.\\
\\
Войны ўсе, бойні ўсе, зрухі ўсе\\
Беларусь аддавалі катам.\\
Зноў касе зіхцець у крывавай расе.\\
Адкляпаў яе ўвішны атам.\\
\\
Сваякі сатаны гандлявалі душой,\\
Беларусь распіналі вякамі,\\
Прабівалі далоні, што пахлі дзяжой,\\
Не цвікамі,\\
А мерцвякамі.\\
\\
Усявышні,\\
Хоць крошак зор накрышы,\\
Разгавей беларусу вячэру.\\
Згінь, крумкач, не кружы,\\
Беларусь на крыжы\\
Уваскрэсне ў пакутах за веру.\\
\\
Як не выдасць Бог,\\
Не з’ядуць вепрукі.\\
Толькі вернік надзеяй дужы.\\
\\
Крошкі зор збяруць у Бога з рукі\\
Выраі –\\
Беларусаў душы.\\
\\
Як там ні варажы,\\
Што там ні кажы,\\
Паздзіралі з храмаў крыжы\\
Вылучэнцы, выжлы, віжы.\\
I самой апраметнай заложнікі,\\
Цвеляць д’ябла сп’яна бязбожнікі:\\
I вяселле ў нас,\\
I ігрышча ў нас,\\
Хаваемся мы ў салому,\\
Няхай ішчуць нас.\\
\\
I ў саломе, як зерне,\\
Знойдуць іх,\\
Бог сваіх,\\
Чорт сваіх...

 


===== Падобныя старонкі =====
  * [[творы/іншае/сучасная-літаратура-беларусі/сучасная-паэзія-беларусі]]
  * [[творы/іншае/сучасная-літаратура-беларусі/сучасная-літаратура-беларусі]]
  * [[творы/ян-баршчэўскі/ян-баршчэўскі-шляхціц-завальня-або-белар-75]]
  * [[творы/ян-баршчэўскі/ян-баршчэўскі-шляхціц-завальня-або-белар]]
  * [[творы/іншае/сучасная-літаратура-беларусі/сучасная-проза-беларусі]]