~~META:
title = Раіса Баравікова — Успамін пра цётку Яню
&keywords = пакланілася, нізка
&abstract = Верш Раісы Баравіковай "Успамін пра цётку Яню"
&iftrue = nan
~~

====== Раіса Баравікова — Успамін пра цётку Яню ======
Можа, кляў гаспадарку: гары яна гарам.\\
Можа, меў гостры зуб на суседа Кузьму.\\
І аднойчы, ускіпеўшы, яе ён ударыў,\\
і яна пакланілася нізка яму.\\
\\
…І калі на вазок ён падсаджваў другую,\\
у яе на вачах, як купец на карму, –\\
адвярнуўся ад слоў: «Як жа я давякую?!»,\\
і яна пакланілася нізка яму.\\
\\
А пасля лугавінай, нібы па кіліме,\\
да сялібы вяртаўся ён цераз зіму,\\
задыхаўся ад думкі: «А раптам не прыме?…».\\
І яна пакланілася нізка яму.

 


===== Падобныя старонкі =====
  * [[творы/раіса-баравікова/творчасць-раісы-баравіковай]]
  * [[творы/раіса-баравікова/раіса-баравікова-верш-да-дзяцей]]
  * [[творы/раіса-баравікова/раіса-баравікова-старэюць-людзі-дрэвы-і-]]
  * [[творы/раіса-баравікова/раіса-баравікова-барбара-радзівіл]]
  * [[творы/раіса-баравікова/раіса-баравікова-жыву-і-дзякуй-не-ў-прас]]