~~META:
title = Раіса Баравікова — Зорка палявая
&keywords = сввятла, вясны
&abstract = Чытаць верш "Зорка палявая" Раісы Баравіковай
&iftrue = nan
~~

====== Раіса Баравікова — Зорка палявая ======
Ах, не трывожце, сэрцу так балюча!\\
Ах, не прыходзьце прывідам у сны!\\
Я пабягу дарогаю гаючай\\
без Вас у далеч бэзавай вясны.\\
\\
Я пабягу, шукаючы прытулак\\
няздзейсненым жаданням у гаі,\\
ад мітусні, ад звону шумных вулак,\\
туды, дзе ноч калышуць салаўі.\\
\\
Калі ж узыдзе поўня караваем, –\\
пазбавіць сэрца смутку і нуды!\\
У ім пакіне зорка палявая\\
свайго святла гарачыя сляды.\\
\\
Ласкава буду зваць яе сястрыцай,\\
ў начное неба кіньце свой пагляд...\\
Магчыма, зорка весняя іскрыцца,\\
а можа, я плыву за далягляд!\\
\\
1978

 


===== Падобныя старонкі =====
  * [[творы/алесь-якімовіч/алесь-якімовіч-чырвоная-зорка]]
  * [[творы/іван-шамякін/іван-шамякін-злая-зорка]]
  * [[ibdc.ped>як-зорка-бярозкаю-стала]]
  * [[творы/якуб-колас/якуб-колас-зорка]]
  * [[ibdc.ped>зорка-венера]]