~~META:
title = Пімен Панчанка — І вера, і вернасць, і вечнасць...
&keywords = гэта
&abstract = Чытаць верш Пімена Панчанкі "І вера, і вернасць, і вечнасць..."
&iftrue = nan
~~

====== Пімен Панчанка — І вера, і вернасць, і вечнасць... ======
І вера, і вернасць, і вечнасць,\\
І наш паэтычны туман –\\
А мо гэта ўсё недарэчнасць\\
І нейкі сусветны падман?\\
\\
І гэта крынічнасць, сунічнасць,\\
Вавёрка, і верас, і бор –\\
Зялёная сімвалічнасць,\\
А шчасця ў жыцці недабор.\\
\\
І хто нам раскажа пра гэта,\\
Ці быў наш задуманы лёс\\
На грані крывавых трагедый,\\
Пад страхам пякельных нябёс?\\
\\
Ці мы захацелі замнога\\
У прагнасці лютай сваёй\\
Ад маці-прыроды, ад Бога,\\
Ад крохкай натуры людской?\\
\\
Забылі зямлі прыцягненне\\
І космасу жудасны лёд.\\
На розум зышло зацямненне,\\
Няма ўжо ні мар, ні натхнення:\\
Ля бездані – мудры наш род...\\
\\
Мы верым падзеям глыбінным\\
Жыццё наша не зарасце\\
Травой.\\
Яно ў нас павінна\\
Быць вечна чысцей і прасцей.\\
\\
1985

 


===== Падобныя старонкі =====
  * [[творы/пімен-панчанка/пімен-панчанка-зварот]]
  * [[творы/пімен-панчанка/пімен-панчанка-вясёлай-маланкаю-ластаўка]]
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/духоўны-свет-лірычнага-героя-ў-паэзіі-пі]]
  * [[творы/пімен-панчанка/пімен-панчанка-сармацкае-кадзіла]]