~~META:
title = Пімен Панчанка — Хлебныя словы
&keywords = акраец, каравай, хлеб, скіба, луста, скарынка, слоў
&abstract = Чытаць верш Пімена Панчанкі "Хлебныя словы"
&iftrue = nan
~~

====== Пімен Панчанка — Хлебныя словы ======
Адценне слоў – не глупства,\\
Ты ім не пагарджай.\\
Скарынка. Скіба. Луста.\\
Акраец. Каравай.\\
\\
Акраец – шлях, дарога\\
І зайцаў хлеб лясны.\\
Скарынка – сум, трывога\\
І боль былой вайны.\\
\\
Здараецца, вядома,\\
Што, выпіўшы ў гасцях,\\
Грызе скарынку дома\\
Пахмурны халасцяк.\\
\\
А скіба – дзень вясновы.\\
Ралля. Плугі. Сяўба.\\
Наш хлеб – жыцця аснова,\\
Працяг і барацьба.\\
\\
А луста – слова сытнае,\\
Духмянае і шчодрае.\\
Яно ад маці – сітнае\\
Ці наздравата-чорнае.\\
\\
А каравай – вясельнае,\\
Святочнае яно.\\
На ручніку нясе яно\\
І радасць, і віно.\\
\\
І справа тут не ў ежы,\\
А ў смачным змесце слоў,\\
І ў жытным ветры свежым,\\
І ў звоне каласоў...

 


===== Падобныя старонкі =====
  * [[ibdc.ped>хлеб-3612]]
  * [[ibdc.ped>хлеб-для-партызанаў]]
  * [[творы/янка-брыль/янка-брыль-сірочы-хлеб]]
  * [[ibdc.ped>хлеб]]
  * [[ibdc.ped>вытаптаны-хлеб]]