~~META:
title = Пімен Панчанка — У навальніцу
&keywords = Панчанка, навальніца
&abstract = Чытаць верш Пімена Панчанкі "У навальніцу"
&iftrue = nan
~~

====== Пімен Панчанка — У навальніцу ======
Перуны грукаталі ў прасторы пустым,\\
Прыгіналіся долу кусты,\\
I у цёмным прадонні набухшых крыніц\\
Гаслі водсвіты бліскавіц.\\
\\
Мы стаялі ўдваіх, і тугая каса\\
Ненарокам кранула мой твар,\\
I тады я адважыўся і расказаў\\
Пра сардэчны, як кажуць, пажар.\\
\\
Ты ж глядзела на клён, што на вуліцы мок,\\
Быццам бачыла першы раз.\\
Я адказу твайго дачакацца не мог,—\\
I агеньчык надзеі пагас.\\
\\
Вось і схлынулі хмары, і дождж пераціх,\\
Чуцен кропель буйных перазвон.\\
Асцярожна трымаў на далонях тугіх\\
Серабрыстае зарыва клён.\\
\\
Я з трывогай аб нечым цябе запытаў,\\
Ты хутчэй заспяшыла дамоў:\\
«Я нічога не чула, бо гром грукатаў,\\
Іншым разам раскажаш ізноў».\\
\\
1938

 


===== Падобныя старонкі =====
  * [[творы/пімен-панчанка/духоўны-свет-лірычнага-героя-ў-паэзіі-пі]]
  * [[творы/пімен-панчанка/пімен-панчанка-зварот]]
  * [[творы/пімен-панчанка/пімен-панчанка-сармацкае-кадзіла]]
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/пімен-панчанка-вясёлай-маланкаю-ластаўка]]