~~META:
title = Пімен Панчанка — Ода пешаходу
&keywords = сады, знаёмых
&abstract = Чытаць верш Пімена Панчанкі "Ода пешаходу"
&iftrue = nan
~~

====== Пімен Панчанка — Ода пешаходу ======
Без дачы, без аўтамабіля\\
Жыццё пражыў.\\
I дай мне бог\\
Астатнія адмераць мілі\\
Пры дапамозе ўласных ног.\\
\\
Ідзеш, знаёмых сустракаеш,\\
З табой усе турботы дня.\\
Жывеш, працуеш, адчуваеш,\\
Што землякам ты ўсім радня.\\
\\
А што ў машыне? Мільгаценне...\\
Лятуць сады, дамы, гаі,\\
Снуюць у шкле людскія цені...\\
А вечны страх перад ГАІ?\\
\\
Сустрэў знаёмых выпадкова,\\
Гулі гадзіну іх басы\\
Пра «Запарожац» нейкі новы,\\
Пра гаражы ды тармазы.\\
\\
Пытаюся: ну як унукі?\\
Не разумеюць ні мур-мур.\\
Адзін другому ціснуць рукі:\\
I так, заклёпана. Ажур.\\
\\
Таемнае людское шчасце:\\
Не спіць, худнее і дрыжыць,\\
За дэфіцытныя запчасткі\\
Гатоў ён жонку залажыць.\\
\\
Да вандраванняў не пагасла\\
Мая любоў... Але цяпер\\
Не сяду нават на Пегаса,\\
Ён шмат бяды перацярпеў.\\
\\
А лепей з моладдзю ў паходы\\
На рэкі, у лясы, сады.\\
Няхай зайздросцяць пешаходам\\
Аўтамабільныя зады.\\
\\
1975

 


===== Падобныя старонкі =====
  * [[творы/пімен-панчанка/пімен-панчанка-сармацкае-кадзіла-гдз]]
  * [[творы/пімен-панчанка/пімен-панчанка-вясёлай-маланкаю-ластаўка]]
  * [[творы/пімен-панчанка/духоўны-свет-лірычнага-героя-ў-паэзіі-пі]]
  * [[творы/пімен-панчанка/пімен-панчанка-зварот]]
  * [[творы/пімен-панчанка/пімен-панчанка-сармацкае-кадзіла]]